2 ka Bol-anong polis, naka-

dawat og award ni ‘Bato’

TAGBILARAN CITY, August 25 (PIA)--Duha ka Bol-anong polis sa Bohol Provincial Police Office (BPPO) ang nakadawat og award niadtong Miyerkoles atol sa kasaulogan sa ika-116 Police Service Anniversary nga gipahigayon didto sa Police Regional Office Central Visayas headquarters sa Sugbo.

Si Philippine National Police (PNP) Chief Director Gen. Ronald “Bato” dela Rosa mismo ang nitunol sa award ug medals atol sa maong seremonya nila ni Sr. Insp. Norman Nuez ug SPO4 Crisanto Bonghanoy Jr. 

Si Bonghanoy gigantihan isip Best Senior Police Non-Commissioned Officer for Operation samtang si Nuez gi-ila isip Best Junior Police Commissioned Officer for Administration.

Si Nuez ang police chief kaniadto sa lungsod sa Talibon samtang si Bonghanoy kasamtangang miyembro sa police force sa maong munisipalidad.

Ning bag-o lang, si Nuez gihulipan isip station commander human kini nisugod sa pagpaubos sa Public Safety Officers Advance Course (PSOAC) didto sa Regional Training Center sa Consolacion sa Sugbo sayo ning bulana.

Si Dela Rosa gidapit isip guest of honor ug mamumulong sa maong kasaulogan diin kapin sa 20 ka polis ug police units ang gihatagan usab og award.

Ang PNP chief gihataga og arrival honor niadtong adlawa nga gipangunahan ni PRO-7 director Chief Supt. Jose Mario Espino.

Nitambong usab sa maong kasaulogan sila Bohol Gob. Edgar Chatto ug Cebu Gob. Hilario Davide Jr. (ecb/PIA7-Bohol)

Si PNP Chief Director Gen. Ronald “Bato” dela Rosa (ika-4) gitaliwad-ani nila Bohol Gob. Edgar Chatto ug Cebu Gob. Hilario Davide Jr. atol sa kasaulogan sa ika-116 Police Service Anniversary nga gipahigayon didto sa Police Regional Office Central Visayas headquarters sa Sugbo diin 2 ka Bol-anong polis sa BPPO ang nakadawat og award. (hulagway sa EdChatto Bohol)