Luwas ra mokaon og manok 

TAGBILARAN CITY, August 25 (PIA)--Dili angay mahadlok ang mga Bol-anon sa pagkaon og manok tungod kay luwas ra kining kan-on taliwala sa mga natahong bird flu virus didto sa Luzon karon.

Kini ang gibutyag ni Provincial Veterinarian Dr. Stella Marie Lapiz atol sa gipahigayong Kapiha sa PIA kagahapon.

Matud pa ni Dr. Lapiz, kinahanglan lamang nga lutuon og maayo ang mga karneng manok ug itlog usa kini kaonon.

Gihimo ni Dr. Lapiz ang maong pahayag tungod kay daghan ang nahadlok nga mokaon og manok karon tungod sa bird flu sa Pampanga nga nahimong hinungdan nga gipatay ang libuang manok nga giingong nataptan sa maong virus.

Apan gitataw niini nga wala nakasulod ang bird flu virus dinhi sa lalawigan ug walay natalang insidente sa mga manok dinhi nga adunay mga simtomas sa maong sakit.

Ang bird flu o sa terminolohiyang medikal avian influenza, usa ka sakit nga makaapekto sa mga langgam sama sa manok, itik o pabo. Dala kini sa impeksyon sa influenza virus strain nga A (H5N1). 

Kining maong sakit nakaapekto sa pipila ka nasod sa Europa, Asya ug sa amihanang bahin sa Africa. Apan dinhi sa Pilipinas, nahimong hugot ang pagbantay aron dili makasulod ang maong sakit ug makaapekto sa mga langgam sa nasod, mao nga nagpabiling gawasnon ang nasod sa maong sakit.

Gidugang pa ni Dr. Lapiz nga wala pay natalang kaso sa tawo nga natakdan og bird flu sa Pilipinas o di kaha nagkasakit sa pagkaon og manok nga may bird flu. (ecb/PIA7-Bohol)

Si Provincial Veterinarian Dr. Stella Marie Lapiz (ikaduha) mi-klaro atol sa gipahigayong Kapiha sa PIA kagahapon nga luwas ra mokaon og manok basta lutuon lamang kini og maayo. (ecb/PIA7-Bohol)