Sumbanan sa suholan sa Nat’l Heroes Day, 

gipahinumdom sa DOLE sa mga employer

TAGBILARAN CITY, August 29 (PIA)--Nipahinumdom ang Department of Labor and Employment (DOLE) sa mga employer sa pribadong sektor nga hingpit nga ipatuman ang sumbanan sa suholan sa pagtimaan sa National Heroes Day kagahapon, Agosto 28 nga usa ka regular holiday.

Agi og pagsunod sa Proclamation No. 50 nga gipagawas niadtong niaging tuig, ang DOLE nagpagawas og mga sumbanan alang sa saktong pagbayad sa suholan alang sa special non-working holiday ug regular holiday.

Tungod kay ang pagtimaan sa Nasudnong Adlaw sa mga Bayani usa man ka regular holiday, ang mga mosunod nga sumbanan sa pagpa-sweldo ang angay ipatuman:

Kun ang empleyado wala ni-trabaho sa maong adlaw, angay siya bayran og 100% sa iyang suholan sa maong adlaw [(Inadlaw nga suholan + COLA) x 100%].

Alang sa pagtrabaho sa regular holiday, angay bayran og 200% sa regular nga suholan sa empleado alang sa unang walo ka oras [(Inadlaw nga suholan + COLA) x 200%]; samtang ang trabahong ginahimo sa kapin sa walo ka oras (overtime), angay bayran og dugang 30% sa inoras nga suholan sa empleyado [(Inoras nga suholan sa iyang inadlaw nga kita x 200% x 130% x pila ka oras nga pagtrabaho)].

Samtang, ang trabahong gihimo sa maong adlaw nga mao usab ang adlaw nga tigpahulay kun ‘rest day’ sa empleyado, angay kini bayran og dugang 30% sa iyang inadlaw nga suholan nga 200% [(Inadlaw nga suholan + COLA) x 200%] + [30% (Inadlaw nga suholan x 200%)].

Ug ang trabahong gihimo usab sa kapin sa walo ka oras (overtime), angay bayran og dugang 30% sa iyang inoras nga kita [(Inoras nga suholan sa iyang inadlaw nga kita x 200% x 130% x 130% x pila ka oras nga pagtrabaho)]. (ecb/PIA7-Bohol)

================

Pagpasuot og tag-as nga takong ug dugay

nga pagtindog sa trabaho, bawal na

TAGBILARAN CITY, August 29 (PIA)--Gidili na sa Department of Labor and Employment (DOLE) ang pugsanong pagpasuot og tag-as nga takong o high heels sa trabaho. Gimando na usab ang may bayad nga break sa mga trabahanteng duha ka oras nga nagtindog. 

Kini human gilagdaan niadtong Agosto 25 ni DOLE Kalihim Silvestre Bello III ang department order nga nagbawal na sa pugsanong pagpasuot og high heels ilabi na sa mga trabahong nanginahanglan og taas nga oras nga pagtindog.

Ubos sa maong department order, bawal na ang pugsanong pagpasuot sa tanang takong nga molapas sa usa ka pulgada o 1 inch.

Kinahanglan na usab hatagan og 15 minutong break o pahulay ang mga trabahanteng duha ka oras nang nagtindog. Bawal silang kaltasan sa sweldo kun magpahulay sulod sa 15 ka minutong break.

Kini agi og tubag sa pagtuon sa Bureau of Working Conditions (BWC) diin giingong dili maayo sa kahimsog ang taas nga oras nga pagtindog kapin sa duha ka oras nga gipa-grabe pa sa pugsanong pagpasuot og sapatos nga tag-as og takong.

Mag-atubang og silot ang bisan kinsang employer nga dili mosunod niining bag-ong patakaran. (ecb/PIA7-Bohol)

================

Sept. 1, gideklarar nang holiday 

agi og pagtimaan sa Eid’l Adha

TAGBILARAN CITY, August 29 (PIA)--Pormal nang gi-deklarar sa Malakanyang isip regular holiday ang Setyembre 1, 2017.

Kini alang sa obserbasyon sa Eid’l Adha o Feast of Sacrifice.

Sa Proclamation Number 297 nga gilagdaan ni Presidente Rodrigo Duterte karong adlawa, nakabutang ang deklarasyon sa Setyembre 1 isip regular holiday sa tibuok nasod.

Kini base na usab sa rekomendasyon sa National Commission on Filipinos.

Alang kini sa pakighiusa sa atong mga igsuong Muslim sa ilang selebrasyon sa Eid’l Adha o Feast of Sacrifice.

Ang Eid’l Adha ang ikaduhang pinakadakong festival alang sa mga Muslim.

Sinyales kini sa pagtapos sa tinuig nga Hajj pilgrimage sa Mecca. (ecb/PIA7-Bohol)