Duha ka Lupon sa Bohol finalist

sa nasudnong bangga sa DILG

TAGBILARAN CITY, August 1, 2017 (PIA) --Ibangga sa ubang labing hawod nga mga tigpatuman sa sa nasudnon nga Barangay Justice System (BJS) ang duha ka hugpong sa mga Lupong Tagapamayapa sa Bohol. 

Kini maoy gibutyag ni Josie Montes sa Department of Interior and local Government (DILG) atul sa pagtanyag sa mga provincial Lupong Tagapamayapa Incentive Awardees (LTIA) dungan sa tigum sa Provincial Peace and Order Council (PPOC) Agosto 29. 

Automatic nga duha, ang Lupong Tagapamayapa sa Can-opao Jagna midaug sa provincial search sa labing hawod nga lupon alang sa first ngadto sa third class municipalities, samtang ang lupon sa Bingag maog milugwang midaug alang usab sa 4th ngadto sa 6th class towns. 

Si Kapitan Jocelyn Pagtanac maoy tsirman sa Lupon sa Can-opao samtang si Kapitan Jose Rey Bomdeiano maoy stirman usab sa Lupon sa Bingag. 

Sanglit provincial winners, sila usab ang gidala ngadto sa Regional LTIA nga gipasiugdahan sa DILG ug mao na usay opisyal nga entries ngadto sa nasudnong bangga, dugang ni Montes. 

Ang provincial nga validation gihimo sa Provincial Awards Committee nga gilangkoban sa DILG, Provincial Prosecutors Office, Regional Trial Court, Liga nga mga Barangay-Bohol, sa Philippine National Police ug usa ka Non Government Organization, pasabut ni Montes. 

Human sa table assessments ug on-site validation sa mga nominado sa mga Municipal Interior and Local Government Officers (MILGO), migawas nga nakakuha usab og maayong grado ang mga Lupon sa Matabao, Tubigon pinangulohan ni Kapitan Joel Serohijos isip second runner up samtang ang Lupon sa Suba, Talibon nga pinangulohan ni Kapitan Eligido Monte maoy nakakuha sa unang pwesto alang sa 1st ngadto sa third class Municipality category. 

Alang sa 4th ngadto sa 6th class municipalities category, nakuha ang 2nd runner up sa Lupon sa West Poblacion Alburquerque pinangulohan ni Kapitan Alex Andoy samtang nakasakmit sa first runner up ang Lupon sa Nahawan clarin pinangulohan ni Kapitan Arsenio Degamo. 

Sa kadako sa tabang sa mga Lupon sa pagpaneguro nga kubsan ang mga kaso nga ikasang-at sa mga korte ug hiloton na lamang ang mga panagsungi sa mga katagi-barangay, mitanyag ang Kapitolyo og P100,000 isip ganti sa Outstanding Lupon. 

Laing P50,000 usab ang gidawat sa mga runners up, nga gitunol usab ni Gob Edgar hatto kauban ang mga sakop sa Sangguniang panlalawigan ug sa DILG nga girepresentahan ni Montes ug ni Maria Reina Quilas. 

Gipadayag ni Gob Edgar Chatto nga ang programa sa pagpatuman sa Barangay Justice System labing mahinungdanon tungad kay ang mga komunidad nagamhan na sa paghusay sa mga isyu samtang nagpalingkawas sa mga dugang gasto ug kahasul sa mga korte sa paghusay sa mga ginagmay nga panagbangi. 

Hinuon, ang ganti nga salapi, alang lamang magasto sa mga community projects nga himoon sa Lupon alangs a barangay ug dili mahimong makuha kon walay resolusyon sa barangay ug program of Works, paapas ni Gob. Edgar Chatto atul sa tigum. 

Midawat usab ang mga mananaug sa usa ka plake nga gitugyan sa mga pangulo ug tinugyanan sa Bohol. (rahc/PIA-7/Bohol)

Gidawat sa Lupong Tagapamayapa sa Bingag Dauis pinangulohan ni Kapitan Jose Rey Bomediano, ang plake ug premyo nga P100,000 nga gihatag sa Bohol sa ilang pagpaneguro nga naglihok ang ilang barangay paghusay sa mga kagubot aron dili na maobut sa nagkagulgot nga korte. (rahc/PIA-7/Bohol)