PPOC mihangyo pagpabalhin sa

husay nila Nobleza sa kaulohan

TAGBILARAN CITY, August 29, 2017 (PIA) --Pinaagi sa usa ka motion en masse, giduso sa Provincial Peace and Order Council (PPOc) ang lakang pagpalig-on sa tinguha nga ibalhin na sa kaulohan ang paghusay ug pagdungog sa delikado nga kaso batok sa gipasanginlang tigsuporta sa Abu Sayyaf Group (ASG) 

Nahingawa si Provincial Prosecutor Macario Delusa sa security issues ug sa kakuyaw nga nia sa Bohol sa panahon nga dad-on sila Police Superintendent Maria Christina Nobleza ug ang kauban niini nga si Reneer Lou Dongon sa Bohol aron moatubang sa kaso nga gisng-at batok kanila.

Gipasabut ni Fiscal Delusa nga ang pagpabalhin sa venue alang sa pagdungog sa kaso kinahanglang may legal nga kapasikaran ug kinahanglang may daku gayud nga rason aron ihatag sa Korte Suprema. 

Matud ni Delusa, ang husay, kon dinhi himoon sa Bohol may dako nga risgo ug epekto sa turismo. 

Gawas pa niini, usa ka dako nga suliran sa seguridad ang pagpabyahe nila ni PSupt Nobleza ug ang kauban niini nga si Dongon, paapas ni Delusa. 

Si Nobleza gipasanginlan nga misuway og luwas sa mga nasamdang sakop sa ASG nga nakiggubat sa mga kasundalohan ug kapolisan sa Inabanga, Bohol niadtong Abril. 

Giingon nga gilutsan nila ni Nobleza ang checkpoint aron makalabang ug makatabang sa mga samaron ug nagkalisud na nga mga terorista, sa wala pa kini gukora'g madakpi.

Human madakpi, gipasakaan ang duha, kinsa uban usab sa mga sibilyan, sa kaso nga ilegal nga paghupot sa armas, pagpugong sa pagpatuman sa hustisya ug walay pagtahud sa otoridad.

Tungod sa dakong risgo sa seguridad, gidala diretso ang mga dinakpan sa Kampo sa kapolisan sa Crame aron may mas maayong pagbantay. 

Sanglit ang hitabo dinhi sa Bohol, segun sa balaod, kinahanglang dinhi usab husayon. 

Sa pagpatabok og balik nilang Nobleza dinhi, makalilisang nga security measures and gihimo sa mga kasundalohan taliwa usab sa hugon-hugon nga luwason kini o kaha mobawos ang mga kabanay ug kauban sa ideyolohiyang terorismo. 

Ang Bohol mas duol sa Mindanao ug mas dali nga abton sa mga buot moluwas sa mga bihag. 

Sa laing bahin, gidason ni Gob Edgar Chatto ang lakang tungod kay daku usab ug ikagasto ang kagamhanan sa pagpatabok sa bahan ni Nobleza ug kaubanan ilabi na kong ubanan sa security personnel. 

Misaad na matud pa kang Delusa ang mga kapolisan ug mga mibarug nga saksi batok nilang Nobleza nga andam kining molupad ngadto sa kaulohan aron sa pagtestigo, kon ikabalhin man ugaling. 

Lisud nga kuhaon ang pagtugot sa Korte Suprema, matud pa ni Delusa sanglit kinahanglan niini ang enbanc decision alang sa hangyo sa transfer of venue hinungdan nga pinaagi sa PPOC ug sa Sangguninag Panlalawigan, milaum ang prosekusyon nga kahatagag rekonsiderasyon ug hingpit nang ibalhin ang mga husay batok nilang Nobleza, ngadto na sa kaulohan. (rahc/PIA-7/Bohol)

Gipasabut ni Fiscal Macario Delusa ang kakuyaw sa pagdala sa mga suspitsadong sila Maria Cristina Nobleza og Reneer Lour Dongon aron dinhi husayon ug dunggon ang ilang kaso. Gisugyot sa Prosekyutor nga adto na himoon ang husay sa kaulohan. (rahc/PIA-7.Bohol)