DOLE, nagpagawas og pay 

rules alang sa Eid’l Adha

TAGBILARAN CITY, August 30 (PIA)--Nagpagawas og holiday pay rules ang Department of Labor and Employment (DOLE) dungan sa pagsaulog sa mga igsuon natong Muslim sa Eid’l Adha o Feast of Sacrifice sa Setyembre 1.

Sigun pa sa DOLE, makadawat og doble o 200 porsiyento sa inadlaw nga suholan ang mga empleyadong mosulod sa unang walo ka oras sa pagtrabaho.

Angay usab makadawat og dugang nga 30 porsiyento ang mga trabahante sa ilang hourly rate kun inoras nga suholan kun mag-overtime kini.

Apan kun matunong sa adlaw sa tingpahulay kun day-off sa trabahante ug nisulod kini sa trabaho sa maong adlaw, angay siya makadawat og dugang nga 30 porsiyento gawas pa sa double pay niini.

Gawas pa kini sa dugang 30 porsiyento nga angay ihatag sa mga mag-cancel day-off nga trabahante alang sa ilang hourly rate o inoras nga suholan kun mag-overtime kini. (ecb/PIA7-Bohol)

=================

National Crime Prevention Week,

ilusad sa NAPOLCOM-7 sa Bohol

TAGBILARAN CITY, August 31 (PIA)--Ilusad sa National Police Commission (NAPOLCOM) sa Rehiyon 7 ang pagsaulog sa National Crime Prevention Week (NCPW) alang ning tuig 2017 dinhi sa lalawigan sa Bohol karong adlawa. 

Sugdan kini sa usa ka Balaang Misa sa St. Joseph Cathedral ning syudad sa may alas 7:15 sa buntag.

Isunod dayon ang parada gikan sa Plaza Rizal paingon ngadto sa Bohol Cultural Center nga pagasalmotan sa mga kawani sa nagkalain-laing buhatan sa gobyerno sa lalawigan sa Bohol lakip na usab sa mga taga NAPOLCOM sa Rehiyon 7.

Ipahigayon dayon ang programa sa Bohol Cultural Center human sa parada diin pinasidunggang dinapit si Presidential Assistant for the Visayas, Kalihim Michael Lloyd Dino. .

Ang National Crime Prevention Week isaulog matag unang semana sa buwan sa Setyembre agi og pagsunod sa Presidential Proclamation No. 461 nga gilagdaan niadtong Agosto 31, 1994.

Ang kasaulogan sa NCPW karong tuiga nagdala sa tema nga “Mamamayang Mapagmasid, Kapayapaan ang Maihahatid.” (ecb/PIA7-Bohol)