Balaod alang sa mas bug-at nga silot 

batok ‘fake news,’ gilagdaan na 

MANILA, Sept. 4 (PIA)--Gilagdaan na ni Presidente Rodrigo Duterte aron mahimong hingpit nang balaod ang Republic Act No. 10951 nga nagtakda og mga pag-amyenda sa Revised Penal Code diin gibug-atan pa ang silot ug multa sa nagkalain-laing kaso, apil na niini ang pagpakatap og pekeng balita o fake news.

Niining bag-ong balaod, pahamtangan og pagkabilanggo og usa ka buwan ug usa ka adlaw hangtod unom ka buwan ug adunay kaparehong multa nga P40,000 taman P200,000 ang magpapatik og dili tinuod nga ‘balita’ nga mahimong magdala og peligro sa public order o kadaot sa interes sa nasod.

Ubos niining bag-ong balaod, dili libre ang mga trolls nga nagpakatap og fake news sa social media.

Mas bug-at nga silot usab ang ipahamtang alang sa mga kasong treason, rebellion ug uban pang krimen ubos sa gi-amyendahang balaod alang sa Revised Penal Code. 

Reclusion perpetua o pagkabilanggo og 20 taman 40 ka tuig sa treason o pagbudhi nga may multa pang dili molapas sa P4 milyon gikan sa kanhi P20,000 lamang.

Maximum nga silot o unom ka buwan hangtod unom ka tuig nga pagkabilanggo ug multang dili molapas sa P1 milyon gikan sa kanhi P8,000 alang sa mga maglusad og kudeta, rebelyon o insureksyon. 

Samtang prison mayor sa kasong sedisyon ug multang dili molapas sa P1 milyon gikan sa kanhi P10,000.

Gibag-o usab ang silot sa malversation of public funds nga gikan sa kanhi prison correctional, nahimo nang reclusion perpetua kun ang nadispalkong pondo nagkantidad gikan P40,000 ug kapin sa P8.8 milyon. (ecb/PIA7-Bohol)

================

24/7 hotline sa Philhealth,

gibuksan na

MANILA, Sept. 4 (PIA)--Gibuksan na sa Philippine Insurance Corporation (Philhealth) ang ilang 24/7 hotline nga modawat og mga pangutana ug reklamo gikan sa ilang mga miyembro.

Matud pa ni Philhealth Corporate Action Center Head Delio Aseron, mahimo nang makatawag ang ilang mga miyembro bisan unsang oras pinaagi sa numerong (02) 441– 7442.

Dinhi, mahimo nang mapaabot ang tanang sugyot, rekomendasyon ug mga pangutana nga may kalabotan sa benepisyo, reimbursement, Philhealth ID numbers, registration ug uban pa.

Miingon si Aseron nga dakong tabang kining hotline ilabi na sa mga miyembrong naa sa ubang nasod nga poisibleng may mga pangutana samtang sila nagtrabaho sa laing nasod. (ecb/PIA7-Bohol)

=================

Kahibalo sa publiko kalabot sa Japa-

nese encephalitis, hingusgan sa DOH

MANILA, Sept. 4 (PIA)--Plano sa Department of Health (DOH) nga i-apil sa national immunization program sa nasod ang bakuna alang sa Japanese encephalitis sa sunod nga tuig.

Matud pa ni DOH Kalihim Paulyn Ubial, tuyo niini nga hingosgan ang kahibalo sa publiko kalabot sa Japanese encephalitis nga bisan wala pa kini nikuyanap, nakatala na kini og taas nga fatality rate sa nasod.

Gawas niini, gamay lamang ang bakuna alang sa maong sakit ug nagkantidad og P3,000 hangtod P5,000 ang matag usa.

Base sa DOH, nikabat na sa 57 ang natalang kaso sa Japanese encephalitis sa nasod sukad niadtong Enero hangtod Agosto ning kasamtangang tuig diin lima na ang namatay. (ecb/PIA7-Bohol)