ASEAN, gipamatud-ang sayop ang mga 

kritiko sa milabay nga 50 ka tuig – Cayetano

MANILA, Aug. 8 (PIA)--Gitumbok ni Department of Foreign Affairs (DFA) Kalihim Alan Peter Cayetano nga gipamatud-an sa Association of Southeast Asian Nations (ASEAN) nga sayop ang mga kritiko sa ilang opinyon ug pagtaya sa padulngan sa ASEAN.

Sa iyang mensahe sa closing ceremony sa ika-50 nga ASEAN Foreign Ministers’ Meeting ganinang buntag sa Philippine International Convention Center (PICC) sa syudad sa Pasay nga gitambongan ni Presidente Rodrigo Duterte, miingon si Cayetano nga nipahayag kaniadto ang mga kritiko nga mahugno ug mapakyas lamang ang pangandoy sa ASEAN apan nasayop sila human milabay ang 50 ka tuig.

Matud pa ni Cayentano, malampuson karon nga napalig-on, nagmalinawon ug napa-ugmad sa ASEAN ang rehiyon taliwala sa mga hagit nga giatubang gikan sa panaglahing idolohiya, pagtuo, sistemang pampolitika ug kultura.

Apan bisan pa sa mga panaglahi, nipatigbabaw ang panaghiusa, panag-igsuonay ug nagkahiusang pangandoy alang sa malinawon ug maugmaron nga ASEAN Community.

Dungan niini, gipahayag ni Cayetano nga naglaom siyang dalhon paule sa mga foreign minister sa ilang mga kasingkasing ang Filipino hospitality, pagmahal sa silingan nga nasod ug aplikasyon sa diwa sa ASEAN isip usa ka komunidad.

Apil usab sa mga nitambong nga opisyal sila kanhi Presidente Fidel Ramos ug Bise Presidente Leni Robredo. (ecb/PIA7-Bohol)