TechVoc training institutions

Walay katungod mangrecruit

TAGBILARAN CITY, August 4 (PIA)—Wala’y balaod nga nagtugot sa mga training institutions nga nagbansay sa mga technical ug vocational skills, sa pagpang recruit og mga trabahante ngadto sa laing mga nasud. 

Kini maoy gipasabot dalang pahimangno sa Department of Labor and Employment (DOLE) ngadto sa mga naglaraw pa gihapon nga makakuhag sapi pinaagi sa pagkobrag placement fees ug pagpahiluna kunohay sa ilang mga nabansay sa mga trabaho sa gawas sa nasud.

Pahinumdom ni labor and employment officer German Guidaben, usa kini ka matang sa pangilad.

Walay mga training institutions, bisan pa niadtong accredited sa Technical Education and Skills Development Authority (TESDA) ang gitugotan sa pagpang recruit, sulti ni Guidaben.

Kini nga pahimangno giluwatan sa ahensya sa kagamhanan nga gisangonan sa pagdumala sa pamuo ug pagpanarbahoan, taliwa sa kontrobersya kabahin sa giingong tagdumala sa usa ka training institution nga natanggong sa Japan.

Ang gikatahapan nagdala og mga Bol-anon nga iyang nabansay sa technical vocational skills ngadto sa Japan, sa tuyo nga pasudlon og trabaho.

Wala man direktang gibutyag ni Guidaben ang mga detalye sa kaso, iya nga gipasidaan nga bisan sa pasalig sa student’s visa. 

Kini, matud pa sa DOLE, matang sa salaud nga nailhang trafficking in persons. 

Ang trafficking in persons usa ka salaud nga mas bug-at pa gani kay sa illegal recruitment. 

Kasagarang mga tawo nga biktima sa trafficking naglangkub sa pugos nga pagtrabaho, pagkahigut sa utang, pugos nga pagpatrabaho sa mga bata, paghimong sex slaves, mga batang sundalo ug alang sa pagpangutlo sa parte sa lawas.

Dinhi sa Bohol, ang National Bureau of Investigation sa Bohol padayon nga naghimo og mga operations batok sa mga illegal recruitment ug sa mga illegal recruiters.

Matud sa DOLE, ang pagpanghanyag og trabaho puli sa kwarta nga ibayad usa na ka matang sa illegal recruitment nga makapapriso. (rahc/PIA-7/Bohol)