Balaod sa libreng tuition sa SUCs, 

gilagdaan na ni Duterte – Palasyo

MANILA, Aug. 4 (PIA)--Gilagdaan na ni Presidente Rodrigo Duterte ang Republic Act 10931 nga gitawag og Universal Access to Quality Tertiary Education Act o balaod alang sa libreng tuition sa state universities and colleges (SUCs).

Gi-anunsiyo kini ni Deputy Executive Secretary for Legal Affairs Menardo Guevarra sa Mindanao Hour nga gipahigayon sa International Media Center sa syudad sa Pasay.

Matud pa ni Guevarra, nahinabi na ni Duterte ang iyang economic managers aron matun-an ang implikasyon niini sa national budget.

Dugang pa sa Kalihim, maggikan ang pondo sa i-realign nga alokasyon sa ubang ahensiya sa gobyerno.

Gipahayag usab ni Guevarra nga bahala na ang Kongreso kun asa kuhaon pa ang kinahanglang pondo alang niining bag-ong balaod.

Apan ang allowance o subsidy sa mga gamit sa mga estudyante, giingong i-proseso pa kun asa kuhaon.

Gipadayon gihapon ang paglagda sa maong balaod ni Duterte bisan pa sa tambag sa iyang mga economic managers nga i-veto kining balaodnon.

Matud pa sa iyang mga economic managers, walay igong pondo ang gobyerno aron mapondohan kining programa.

Una na usab miingon si Department of Budget and Management (DBM) Kalihim Benjamin Diokno nga manginahanglan og P100 bilyon ang gobyerno aron mapondohan ang libreng tuition sa mga SUCs. (ecb/PIA7-Bohol)

=================

Programang “Bangon Marawi,” gilusad

sa 50th ASEAN Ministers Meeting

MANILA, Aug. 4 (PIA)--Pormal nang gilusad ang programang “Bangon Marawi” sa ika-50 nga ASEAN Ministers Meeting karong adlawa didto sa Conrad Hotel sa syudad sa Pasay.

Alang kini sa unang lakang sa rehabilitasyon sa syudad sa Marawi nga grabeng naapektuhan sa nagpadayon nga binakbakay tali sa tropa sa gobyerno ug Maute terror group.

Sa gipahigayong “We Build Marawi” Forum, miingon si Presidential Communications Operations Office (PCOO) Kalihim Martin Andanar nga pursigido gayud ang gobyerno nga makabalik ug makabangon dayon ang mga residente sa maong lungsod nga biktima sa kagubot.

Giingong nasayod ang gobyerno sa gibati sa mga pamilyang namatyan ug nawad-an og panimalay tungod sa pagpangsunog sa mga terrorista ug airstrike sa gobyerno.

Sa gipahigayong forum, nihatag og mga detalyadong plano ang mga sub-committe sa Taskforce Bangon Marawi gikan sa pagpatukod sa mga establishemento, pabalay, paghatag og trabaho ug pagsiguro sa kalinaw ug kahusay sa maong lugar.

Gawas ni Andanar, nitambong usab ang mga miyembro sa gabinete nga sila si National Defense Kalihim Delfin Lorenzana, Department of Public Works and Highways (DPWH) Kalihim Mark Villar, Department of Social Welfare and Development (DSWD), Kalihim Judy Taguiwalo ug Department of Interior and Local Government (DILG) Kalihim Catalino Cuy.

Matud pa ni Andanar nga gitunong nila ang paglusad sa “Bangon Marawi” sa 50th ASEAN Ministers Meeting tungod kay makunsiderar kining regional peace and violent extremism issue.

Una nang gi-anunsiyo ni Presidente Rodrigo Duterte ang pasiunang P20 bilyon nga gamiton sa rehabilitation efforts sa syudad sa Marawi. (ecb/PIA7-Bohol)

================

BI, nagpagawas og travel rules

sa mga opisyal, kawani sa gobyerno

TAGBILARAN CITY, Aug. 4 (PIA)--Nagpagawas og bag-ong sumbanan ang Bureau of Immigration (BI) sa mga opisyales ug kawani sa gobyerno nga nagplanong magbakasyon sa gawas sa nasod.

Matud pa sa BI, tugotan nang makaadto sa bisan asang nasod ang bisan kinsang empleyado o opis­yal sa gobyerno nga dili na kinahanglan pang magpakita sa airport og authority to travel gikan sa departamento o buhatan niini.

Ang mga local government units (LGUs) personnel kinahanglan na lamang magpakita og kopya sa aprubadong leave application sa immigration officer.

Samtang, gitataw usab sa BI nga ang bag-ong sumbanan dili mahimong gamiton sa mga provincial governors ug mayors sa mga highly urbanized ug chartered cities diin kinahanglang magpakita pa sila og travel authority gikan sa Department of the Interior and Local Government (DILG) Undersecretary nga magpamatuod nga gitugotan kining makagawas sa nasod. (ecb/PIA7-Bohol