Bagyong Noru mopagrabe sa

nagpasuwabe nga habagat

TAGBILARAN CITY, August 3, (PIA) --Mahimong maguyod gihapon sa Bagyong Noru ang nag-ungot nga habagat nga makabukaw sa dagat ug magpadagko sa mga bawod. 

Kini maoy kinatibuk-ang kasayuran nga mahagpat gikan sa pahibaw nga gipagawas sa philippine Atmospheric Geophysical and Astronomical Services Administration (PAG-ASA) nga gipagawas ganinang alas 4:00 sa hapon, Huwebes Agosto 3. 

Samtang ang habagat maoy nagpasuwabe nga nakaangin na sa kahimtang sa panahon sa kasadpang bahin sa nasud, mahimong kini pagrabehon pa sa bagyong Noru. 

Ang bagyo nga si NORU, nasigpatan sa mga naniid nga naa na sa 28.0°N, 134.2°E ug kini naa sa 1500 kilometros Amihanang kasubangan sa ngilbit sa Northern Luzon ug naa sa gawas sa Philippine Area of Responsibility. 

Apan dala ning bagyoha ang maximum nga gikusgon sa hangin nga nagdalag kalit nga paghuros gikan sa 160 ngadto sa 195 kilometros matag oras. 

Gibanabana nga kini maga-irog sa rumbo nga Amihanang kasadpan sa gikusgong 15 kilometros matag oras, ug magguyod sa dautang panahon nga giapektohan sa habagat. 

Tungod niini, mapaabut ang mapanganurong kalangitan kuygan sa hinay ngadto na sa kasarangan nga uwan dala na usab sa habagat ug posible nga panagsang kusog nga bunok sa uwan ug huros sa hangin tungod sa thunderstorms nga masinati sa Metro Manila, mga rehiyon sa Ilocos, Western Visayas ug Zamboanga Peninsula, lakip na ang mga lalawigan sa Zambales, Bataan, Cavite, Batangas, Mindoro ug Palawan. 

Mapanganuron usab nga kalangitan ubanan sa panagsang uwan o thunderstorms ang maghari sa nahibiling bahin sa nasud. 

Kasarangan ngadto sa panagsang kusog nga huros sa hangin gikan sa habagatang kasadpan maoy mangibabaw sa amihanan ug kasadpang bahin sa Luzon nga maka-angin sa medyo kabaluron ngadto na sa baluron gayud nga mga kadagatang duol sa baybayon. 

Sa uban nga bahin, ang hangin naa sa hinay ngadto sa kasarangan nga magagikan sa habagatang kasadpan ug maoy makapatandug sa dagat. 

Dala niini, nagpahinumdom ang PAG-ASA ug nga sakop sa Disaster and Risk Reduction Management Councils nga kon mahimo, likayan una ang pagpalawod ilabi na sa mga gagmay nga sakayang pangdagat. (rahc/PIA-7/Bohol)