Visayas Grid naa sa red alert,

rotational power mapa-abut

TAGBILARAN CITY, August 3, (PIA) --Gipailawom sa National Grid Corporation of the Philippines (NGCP) ang kinatibuk-ang Visayas Grid sa red alert Agosto 3, gikan sa alas 5:00 nagdto sa alas 10:00 sa gabii. 

Gibutyag sa tigpamaba sa NGCP nga si Betty Martinez nga ang kinatibuk-ang kapasidad sa gihiusang gahum dagitab sa Visayas naa sa 1,828 megawatts (MW), samtang ang gitagna nga labing dako nga panginahanglan sa koryente, naa sa 1,840 MW.

Niini, napakita nga may pagkuwang sa koryente nga mokabat sa 12 megawatts. 

Dugang sa NGCP, ang ang pagkuwang sa supply sa koryente sa Visayas grid tungod kini sa generation deficiency o kakuwang sa gipagawas nga koryente dala sa limitangdong output sa usa ka generating unit sa Palm Concepcion Power Plant (PCPC). 

Kini napagrabe tungod kay hangtud karon, dili pa usab kakuhaan sa kasaligan nga tinubdan sa koryente ang mga plantang geothermal sa Leyte.

Aron kahatagan sa solusyon ang nagpabiling suliran sa koryente, matud sa NGCP nga ilang gibuhat ang pagpahiuli sa usa ka converter station sa Ormoc. 

Kini nga converter station, kon mahibalik na sa pagbuhat sa iyang gimbuhaton, maoy maka-dawat sa koryente nga mahimong makuha sa Visayas gikan sa Luzon.

Apan samtang dili pa kini magamit ug samtang nagpadayon pa ang pag-pahiuli niini, miawhag ang NGCP sa mga konsumidor nga makisayud na gikan sa ilang mga Distribution Utilities sa mga schedule kon kanus-a ipailawon ang ilang mga kabalayan sa rotational power interruptions dala sa pag-angay-angay gayud sa makuhang koryente. (rahc/PIA-7/Bohol)