Purok: katapusang paglaum

mabuntog ang TB sa Bohol 

TAGBILARAN CITY, August 3, (PIA) --Misalig gihapon ang mga tinugyanan sa kasanihan nga nagtutok sa pagbuntog sa sakit nga tuberculosis nga makatabang ang mga purok sa pagpangita sa mga may sakit nga gihambin nga sama niini. 

Matud sa Provincial Coordinator sa National Tuberculosis Program nga si Polizena Rances, milaum sila nga ang purok nay magpaaghat sa mga may sakit nga TB nga mogawas aron katambalan. 

Niining tuiga, subo nga wala makaabut ang Bohol sa target niini nga paabton sa 90% ang pagtumbok sa mga pasyente nga may suliran sa TB (TB case detection rate). 

62% lamang ang provincial TB detection rate samtang 90% ang target niini nga makab-ot, butyag ni Rances sa Kapihan sa PIA alang sa Buwan sa Baga (Lung Month). 

Matud sa coordinator sa programa sa TB nga nagabase sa Provincial Health Office (PHO), daghan pa gihapon ang may sakit nga TB apan nagdumili sa pag-adto sa mga tambalanan dala sa kaulaw kay may gihambin nga sakit. 

Gawas pa, ang talaan nga nakuha nila sa mga kaso sa TB, kadto lamang naa pa sa mga pangpublikong tambalanan. 

Niini, wala pay apil ang kadtong mituyo og pagpatambal sa TB sa mga pribadong hospital ug wala malista sa mga Barangay Health Workers (BHW). 

Gipasalig gani sa provincial TB coordinator nga kon mapailawon lamang sa tukmang pagtambal ang kadtong may suliran sa TB, dako ang kasegurohan nga matambalan ug maayo ra kini. 

Ang TB usa ka sakit nga makuha sa kagaw nga madala sa hangin sa panahon nga mo-ubo ang usa ka pasyente nga nataptan niini. 

Gipasabut usab ni Rances nga kon lig-on og resistensya ang usa ka tawo, dili kini dali nga matakdan sa TB kay naa ray 95% sa mga tawo nga matakdan sa BT bisan pag exposed niini. 

ang 95% nga mga tawo kansang lawas nasudlan sa kagaw sa TB, mao ra usab ang nakigbatuk og mibuntog niini. 

Gawas pa, kon may gidudahang sakit tungod sa duha ka semana nga way undang ug gahi nga ubo, panakit sa likod ug dughan ug pagpanakit sa lutahan, pagkaluya, paghugo, hilanat ug pagpangurog, pahiling dayon sa doktor aron kahatagan sa tukmang tambal ug tambag. 

Gisulti usab ni Rances nga dinhi sa Bohol, hangtud makit-an lang og mapatambalan ang pasyente, nilapas na gani sa 90% ang mga naayo. 

Miabut sa 92% sa mga nagpatambal sa TB ang naayo, segun sa datus gikan sa PHO. (rahc/PIA-7/Bohol)