Cusi ug mga delegado sa ACD,

nihimo og 100 ka solar lamps

PANGLAO, Aug. 9 (PIA)--Si Department of Energy (DOE) Kalihim Alfonso Cusi ug ubang opisyal sa maong buhatan nga nitambong sa nagpadayong Asia Cooperation Dialogue (ACD) sa isla sa Panglao naghimo og 100 ka solar-powered lamps kagahapon sa tabang sa lokal nga grade-schoolers.

Ang maong mga lampara gihatag sa 100 ka pamilya sa isla sa Balicasag, Pamilacan ug lungsod sa Panglao, apil na sa pamilya sa 34 ka estudyante gikan sa Lourdes Elementary School sa Panglao isip benepisyaryo.

Ang 34 ka Grades V ug VI nga mga estudyante kauban sa 12 ka piniling Technology and Livelihood Education (TLE) nga magtutudlo sa tibuok Bohol ang bag-o lang gitun-an unsaon pag-konbertir sa kerosene lamps ngadto sa solar ug battery powered lamps, ug nipa-ambit sa ilang nakat-onan ngadto sa mga delegado isip parte sa ACD's Liter of Light: Solar Build Workshop nga gipaghigayon sa Be Grand Resort sa isla sa Panglao.

Si Cusi, isip nangulo sa delegasyon sa host nga nasod, nag-solda ug nihimo sa electronic parts sa solar lamp sa tabang sa tinun-an sa Grade VI nga si Christopher Abellana ug tinun-an sa Grade V nga si Honey Lee Mijares kauban sa Liter of Light founder Illac Diaz ug TLE Teacher Gil Adame sa La Hacienda High School sa Alicia, Bohol.

“What we are doing here among the kids is creating consciousness on the importance of energy for our economic growth,” matud pa ni Cusi atol sa workshop.

Ang maong workshop nagsilbing dakong venue alang sa mga estudyante aron makakat-on ug paghibalag sa mga bag-ong butang nga ilang mapaambit ngadto sa ilang pamilya, kaila ug komunidad, matud pa sa kalihim.

Gidugang usab ni Cusi nga ang maong workshop nialagad sa paghatag sa katawhan, ilabi na sa mga kabataan sa “Power of Choice” sa episyente ug epektibong paggamit sa enerhiya. 

Matud pa nga ang maong mga lampara nitimaan sa paghatag og kahayag o paglaom alang sa katumanan sa mga damgo ug sa pagsugakod sa pagkapalong sa gahom dagitab matag adunay katalagman nga makaapekto sa suplay sa enerhiya.

“With these kinds of projects, the power is already within their hands,” matud pa ni Cusi.

Ang DOE maoy host sa tulo ka adlaw nga ACD, diin gitoki ang energy security, sustainability ug resiliency sa mga nasod sa Asian. (ecb/PIA7-Bohol)

Si DOE Kalihim Alfonso Cusi nangunay pag-solda ug himo sa electronic parts sa solar lamp sa tabang sa tinun-an sa Grade VI nga si Christopher Abellana ug tinun-an sa Grade V nga si Honey Lee Mijares kauban sa Liter of Light founder Illac Diaz isip parte sa Asia Cooperation Dialogue (ACD) Liter of Light: Solar Build Workshop nga gipaghigayon sa Be Grand Resort sa isla sa Panglao kagahapon. (hulagway sa DOE)