Ban sa pagpamutol og 

lubi, gilibkas na sa PCA 

TAGBILARAN CITY, Aug. 11 (PIA)--Gilibkas na ang moratorium sa pagpamutol og lubi sa Philippine Coconut Authority (PCA).

Atol sa gipahigayong panag-tigom sa mga miyembro sa Association of United Development Information Officers in Bohol (AUDIO-Bohol) kagahapon, gipahibalo sa tigpamaba sa PCA-Bohol nga si Allan Cajilog nga gilibkas na ang tulo ka buwan nga ban niadto pang buwan sa Mayo apan ang ilang ulohang buhatan bag-o lang nimando sa pag-implementar sa maong paglibkas sa probinsiya sa Bohol.

Ang temporaryong pagdili sa pagpamutol og lubi gi-implementar sayo niadtong buwan sa Enero sa tinguhang pag-rehab sa industriya sa lubi.

Ang moratorium gipahamtang sa tibuok nasod gawas lamang sa Basilan ug syudad sa Isabela taliwala sa pag-ripaso sa implementing rules and regulations sa Republic Act 10510593, amending RA 8048 o ang Coconut Preservation Act of 1995.

Apan gitataw ni Cahilog nga bisan gilibkas na ang moratorium sa pagpamutol og lubi, angay hingpit nga sundon gayud ang proseso sa pagkuha og permit sa dili pa moputol og punoan sa lubi. (ecb/PIA7-Bohol)