Pagmugna sa Negros Island Region,

gi-kanselar ni Duterte base sa EO 38

TAGBILARAN CITY, Aug. 10 (PIA)--Gilagdaan na ni Presidente Rodrigo Duterte ang Executive Order (EO) Number 38 nga nagkanselar sa Negros Island Region (NIR).

Ang EO 38 nagpapha sa gahom sa Executive Order 183 nga gilagdaan ni kanhi Presidente Benigno ‘Noynoy’ Aquino niadtong tuig 2015 nga nagmugna sa One Negros Island.

Tungod niini, ibalik na sa Rehiyon 6 ang Negros Occidental samtang ibalik usab sa Rehiyon 7 ang Negros Oriental.

Nakalatid usab sa EO ni Presidente Duterte nga tanang kasamtangang personnel sa Negros Island Region gipabalik sa ilang mga kanhi units of deployment o ire-assign sa ubang departamento o ahensiya.

Samtang gihatagan og 60 ka adlaw ang Negros Island Region nga tarungon ang tanan nilang operasyon ug transaksiyon.

Gitahasan usab sa maong EO ang Department of Interior and Local Government (DILG) nga magdumala sa pagbuwag pagbalik sa rehiyon.

Gilagdaan ni Duterte ang EO 38 niadtong Agosto 7 ug mahimong epektibo kini 15 ka adlaw human ang pagkapatik niini sa mga pahayagang may general circulation. (ecb/PIA7-Bohol)