Inter-agency task force nga mag-monitor 

sa Yolanda Rehab, gimugna ni Duterte

MANILA, Aug. 11 (PIA)--Nagmugna na si Presidente Rodrigo Duterte og inter-agency task force (IATF) nga modumala sa gipahigayong rehabilitasyon sa gobyerno sa mga lugar nga naapektuhan sa Bagyong Yolanda.

Gilagdaan sa Presidente ang Administrative Order 5 nga nagduso sa pagmugna og coordinating body aron maseguro ang maayo ug epektibo nga koordinasyon sa mga ahensya sa gobyerno nga nalakip sa gipahigayong rehabilitasyon.

Matud pa sa maong administrative order, ang task force ang mahimong central committee sa mga pang-ehekutibong buhatan ug opisina apil ang mga korporasyong gipanag-iya ug gidumala sa gobyerno.

Pangunahan ang IATF ni Cabinet Secretary Leoncio Evasco nga mao usab ang Presidential Assistant for the Visayas ug Presidential Assistant for Special Concerns.

Apil sa mga miyembro sa task force ang mga kalihim sa Department of Agriculture (DA), Department of Budget and Management (DBM), Department of Education (DepEd), Department of Environment and National Resources (DENR), Department of Interior and Local Government (DILG), Department of Public Works and Highways (DPWH), Department of Social Welfare and Development (DSWD), Department of Trade and Industry (DTI), ug National Economic and Development Authority (NEDA).

May papel usab nga kuptan ang chairperson sa Housing and Urban Development and Coordinating Council (HUDCC), executive director sa National Disaster Risk Reduction Management Council (NDRRMC), general manager sa National Housing Authority (NHA) ug mga administrador sa Land Registration Authority (LRA), Local Waterworks Utilities Administration (LWUA), National Electrification Administration (NEA), National Irrigation Authority (NIA) ug Philippine Coconut Authority (PCA).

Ang task force gitahasan sa pagtahag og report kang Presidente Duterte matag bulan o sa matag higayon nga kinahanglanon kini. (ecb/PIA7-Bohol)

================

Mga mananaog sa Huwarang Pantawid Pamilya ug

Seal of Child Friendly Local Governance, gipasidunggan

TAGBILARAN CITY, Aug. 11 (PIA)--Gipasidunggan ang mga mananaog sa Huwarang Pantawid Pamilya sa Department of Social Welfare and Development (DSWD) ug ang Seal of Child Friendly Local Governance sa Department of Interior and Local Government (DILG).

Gipangunahan kini ni Gob. Edgar Chatto nga miingon nga ang maong mga pasidunggog alang sa pagsukod sa atong mga nahimo aron mahatag nato ang pinaka-maayong serbisyo ngadto sa katawhan.

Gidugang usab ni Chatto nga kinahanglan ang kolaborasyon tungod kay nakatutok man kita sa serbisyo alang sa katawhan.

Ang Provincial Grand Winner sa Pantawid Pamilya mao ang pamilya nilang Genaro ug Rowena Cambangay sa Cambangay Norte, San Miguel.

Nabutang sa ikaduhang dapit ang pamilya nilang Tarcisio ug Emeliana Hinay sa Guindacpan, Balilihan ug pamilya nila Edrich ug Evangeline Baron sa Maslog, Balilihan.

Samtang nakuha ang ikatulong dapit sa pamilya nila Antonino ug Josephine Caduyac sa Matin-ao, Sierra Bullones.

Sa laing bahin, ang Seal of Child Friendly Local Governance gihatag ngadto sa 46 ka local government units diin ang lungsod sa Tubigon ang nahimong national awardee alang sa community of practice.

Ang lungsod sa San Isidro usab ang nahimong regional winner alang sa 2015 presidential award for child friendly municipalities and cities.

Samtang ang lungsod sa Corella ang regional winner ug national finalist sa 2016 presidential award for child friendly municipalities and cities (4th-6th class).

Ug ang lungsod sa Talibon maoy regional winner ug national finalist alang sa 2015 ug 2016 presidential award for child friendly municipalities and cities (1st-3rd class). (ecb/PIA7-Bohol)