Tanang estudyante sa high school, 

obligado nang mopaubos sa drug testing

MANILA, Aug. 14 (PIA)--Gimando sa Department of Education (DepEd) sa tanang pampubliko ug pribadong eskwelahan nga magpahigayon og random drug testing sa mga estudyante sa high school karong tuig.

Matud pa ni DepEd Kalihim Leonor Briones, tuyo sa anti-illegal drugs program sa buhatan nga mahatagan og proteksiyon ug rehabilitasyon ang mga estudyante.

Matud pa sa Kalihim nga kun mogawas nga positibo ang resulta, dili tangtangon o pahamtangan og bisan unsang disciplinary action ang estudyante.

Giingong dili usab makaapektohan ang ilang academic record.

Apan i-rekomendar ang estudyante nga nag-positibo sa ilegal nga droga sa usa ka social worker alang sa counselling ug uban pa.

Samtang giseguro usab sa DepEd nga magpabilin ang pagtahod sa pribadong resulta sa drug testing sa mga estudyante. (ecb/PIA7-Bohol)

================

Bohol, gi-alerto batok sa bird flu

TAGBILARAN CITY, Aug. 14 (PIA)--Gi-alerto ni Gob. Edgar Chatto ang mga Bol-anon batok sa posibleng pagsulod sa bird flu sa lalawigan.

Kalabot niini, nagmugna na ang gobernador og task force aron malikayan ang pagsulod sa maong sakit sa mga manok ug uban pang poultry products ug nimando sa estriktong implementasyon sa pag-ban sa mga poultry products gikan sa Luzon. 

Gimanduan na usab ni Chatto si provincial veterinarian Dr. Stella Marie Lapiz sa pag-koordinar sa tanang hingtungdang ahensya alang sa hugot nga pagpatuman sa ban. 

Ang pagpahamtang og ban sa mga poultry products gikan Luzon temporaryong gipatuman sa Department of Agriculture (DA) ug gipatuman usab kini sa Bohol.

Una nang gipahayag sa DA nga apektado sa avian o bird flu ang lungsod sa San Luis sa lalawigan sa Pampanga diin ilang gi-alerto apil na usab ang mga kasikbit nga lawigan sa Central Luzon.

Samtang ang buhatan sa Department of Health (DOH) nipasidaan sa publiko nga likayan una sa pagkakaron ang pagkaon og mga half-cooked nga manok o bird products ug soft boiled nga mga itlog.

Gipahinumdoman usab ang publiko nga kanunay sundon ang proper sanitation sa pag-andam ug pagluto sa mga poultry products aron protektado gihapon batok sa bisan unsang bacteria o virus. 

Matud pa nga ang proper hygiene o paghugas sa kamot mao ang first line of defense batok sa posibleng infections.

Sa kasamtangan, wala pay natalang human transmission sa avian flu ilabi na sa lalawigan sa Pampanga diin una kining namonitor sa DOH. (ecb/PIA7-Bohol)

===============

‘Dairy Box’ outlet sa Bohol Dairy, 

ilusad sa Agosto 17 sa Carmen

TAGBILARAN CITY, Aug. 14 (PIA)--Makapalit na og mga dairy products ilabi na sa mga produktong gatas gikan sa kabaw ang mga mosuroy sa lungsod sa Carmen.

Gitakdang ilusad sa Philippine Carabao Center (PCC) ang ilang Dairy Box outlet sa Tamboan, Carmen karong Agosto 17, 2017 diin pagadumalaon kini sa Tamboan Farmers Multi-Purpose Cooperative.

Tungod kay nahimong kabahin na ang PCC sa Sustainable Livelihood Program (SLP) sa Department of Social Welfare and Development (DSWD), ang SLP nihatag og starter kit alang sa maong outlet sa Carmen.

Matud pa sa tigpamaba sa PCC nga si Lenefe Libres, kini ang labing unang dairy outlet nila nga gihatagan og assistance sa SLP sa DSWD diin counterpart niini ang Bohol Dairy Cooperative, PCC, LGU-Carmen, Kagamhanang Probinsyal sa Bohol, Department of Trade and Industry (DTI) ug uban pang partner agencies.

Gipasabot ni Libres atol sa bag-o lang gipahigayon nga panagtapok sa mga miyembro sa Association of United Development Information Officers in Bohol (AUDIO-Bohol) nga gitawag kini og Dairy Box tungod kay ang tanang produkto gibutang naman sa box o kahon diin gawas sa mga dairy products, itanyag usab ang ubang mga produktong lokal sa lungsod sa Carmen ilabi na ang mga produkto sa SLP. 

Ang maong Dairy Box usa ka one-stop shop, pasalubong center ug snack area alang sa mga bisita ilabi na sa mga turista nga mobisita sa natanyag na nga Chocolate Hills. (ecb/PIA7-Bohol)