Pilipinas: daku'ng conventional 

energy, gamay nga renewables

TAGBILARAN CITY, August 14, 2017 (PIA) --Panglantaw sa mga lumulihok sa industriya sa enerhiya, hangtud sa sunod nga mga katuigan, 80% pa gihapon ang tinubdan sa koryente ang ihatag sa conventional nga mga tinubdan, bisan pa sa mga kabag-ohan sa teknolohiya. 

Kini usab samtang ang nasud nangandam gihapon nga sugnoran pa ang industriyalisasyon aron mo-andar ang makina sa kaugmaran. 

Sa panglantaw sa Department of Energy (DOE), gibutyag ni Kalihim Alfonso Cusi nga sa dinali-ang panginahanglan sa pagpa-andar sa mga industriya, magpadayong pang mogamit ang Pilipinas lakip na ang Asya sa fossil fuels sama sa lana ug uban pang tinubdan sama sa uling. 

Gani, dugang ni Sec Cusi nga sa 80% nga panginahanglan sa koryente, 50% niini gilauman nga ikahatag sa napabag-o nga teknolohiya sa limpyong uling. 

"Daku na og naabut ang pag-ugmad sa limpyo nga teknolohiya sa uling, matud pa ni Sec. Cusi. 

Kanunay nga gipatuong hugaw nga tinubdan, ang teknolohiya sa mga planta nga migalit sa limpyong uling, kanunay nga gimonitor sa Department of Environment and Natural Resources ug mga international monitors aron maseguro nga menos ang gibuga niining takuling, pasabut sa kalihim sa enerhiya nga nagpadagan sa kampanya sa enerhiya sa nasud. 

Giangkon man sa DOE nga dili gyud 100% nga walay takuling nga ibuga sa mga planta, kini, matud pa, gipasaligan sa Departamento sa Kasanihan nga dili makadaut sa panglawas sa tawo. 

Matud sa DOE, ang limpyong teknolohiya sa uling maoy labing barato ug mas kasaligang tinubdan ilabi na kay mga mga uling nga gimina sa Pilipinas, o mapalit sa Australia, Indonesia ug sa Russia. 

Ang laing 20% nga panginahanglan, tubagon sa renewable energy sama sa Wind Power, Solar, Hydro, ug geothermal lakip na ang biomass. 

Ang nakalisud ning renewables, matud sa DOE, dili permi ang iyang supply: kon mapanganuron ang kalangitan, dili makapundo og solar energy ug kon hinay ang tubig, gamay ra usab ang koryente sa hydro-power plants. 

Hinuon, gipatun-an na usab sa kagamhanan ang kamaayo sa paggamit na lang sa Bataan Nuclear Power Plant, nga matud pa ni Cusi, biktima sa pagpangdaut dala na sa dautang politika. 

Hagit sa DOE, kinahanglang tun-an og maayo ang epekto sa nuclear ayha pa hukman kon gamiton pa ba kini o dili. (rahc/PIA-7/Bohol)