Cacao production enhancement sa 

DOST SET-UP Agosto 18 sa NIA-7

TAGBILARAN CITY, August 17, 2017 (PIA) --Itanyag na usab sa Department of Science and Technology (DOST) uban sa ilang Small Enterprise Technology Upgrading Program (SET-UP) Academy ang gikahinamang Cacao Productivity Enhancement Training Agosto 18, 2017 didto sa National Irrigation Administration Training Center sa Dao, atbang sa Panda Tea Garden. 

Kini kabahin sa gihandum usab nga pagpadaghan sa pagpananum ug sa pagproseso sa cacao aron mamahimong tsokolate. 

ANG DOST SET UP nagtumong sa paghatag og suporta ug pagpatunhay sa pag-ugmad sa micro small ug medium enterprises (MSMEs) ilabi na sa nag-unang tumong sa pagpapas sa kawad-on ug pagpadaghan sa kahigayunan sa kapanarbaho-an. 

Kahinumduman nga ang cacao usa sa mga natumbok nga mga produktong dunay taas nga balor nga commercial crop ug mo-angay sa yuta sa Bohol. 

Ang cacao usa ka tanum kansang bunga may liso nga kon ibuwad og sangagon, mahimong nag-unang ingredient sa stokolate.

Sa milabay nga mga katuigan, gihimo na dinhi sa Bohol ang agribusiness investment forum alang sa cacao aron ikapadayag sa Department of Agriculture ang teknikal nga mga kasayuran kabain sa pagpananum ug pagproseso lakip na ang pamuhunan niini. 

Subay niini, gitanyag sa DOST ang bansay aron ikapakatap usab ang mga pamaagi sa pagpananum, pagproseso ug pagpamuhunan sa cacao, matud ni DOST information Officer Vina Antopina.

Ang cacao, bisan pa kon kuwang ang supply niini sa Bohol, mamahimo gihapon nga sugdan sa pagpananum tungod kay may dakung potensyal sa negosyo ilabi na sa nagkalapad nga panginahanglan sa himoonon sa tsokolate. 

Mismo ang mga negosyante nga tighimo nag tsokolate nga nia sa Bohol miangkon sa kakauwang sa supply sa cacao hinungdan sa taas nga presyo sa palit niini. 

Ang bansay ugma, may registration fee nga P200 matag partisipante ug kinahanglang mo confirm sa interes nga moapil pinaagi sa pagtext sa 0920-250-1808 aron malista. (rahc/PIA-7/Bohol)