PMA buot padaghanon ang mga
'sano opisyal sa kasundalohan
TAGBILARAN CITY, August 17, 2017 (PIA) --Tumong sa Philippine Military Academy (PMA) nga ipadayon na ug padaghanon ang mga Bol-anong "paisano" nga magbansay pagka opisyal sa kasundalohan.
Alang karong tuiga, mas maayo og sobra sa 5 ang madawat ngadto sa tunghaan sa Fort del Pilar sa Baguio City.
Kining pangindahay gikan sa mismo hepe sa Academic Group sa PMA nga si Lieutenant Colonel Ryan Celino, kinsa mipahibaw nga sa Dominggo na pohon, Agosto 20 ang eksaminasyon pagsud sa PMA ug didto himoon sa Holy Name University (HNU) sa Dampas.
Sa nanglabay nga mga katuigan, napakita nga nagasaka ang enrollment sa mga Bol-anon sa PMA, matud niya didto sa Kapihan sa PIA.
Gikan sa tagsa lamang ka buok sa nanglabay nga katuigan, nahimong tulo kini sa duha ka tuig ang milabay og nahimong lima sa miaging tuig, matud ni Col Celino.
Niini, ilang gihagit ang mga Bol-anong kabataan nga nag edad og 17 hangtud sa 22 nga mosuway sa pagbansay sa pagka-opisyal sa kasundalohan sa nasud.
Kinahanglan usab nga ang aplikante labing menos moabut sa 5 ka tiil ang gitas-on alang sa babaye og lalaki.
Alang sa libre nga entrance test nga himoon sa PMA atul sa ilang tinuig nga recruitment, modawat sila sa walk-in ug dili na kinahanglan pang marehistro online aron dawaton sa pasulit.
Una na nga nagbukas ang PMA sa ilang online registration, apan sa Dominggo, Agosto 20, kinahanglan lamang magdala ang aplikante sa National Statistics Office (NSO) authenticated birth certificate, Grado nga nakuha sa katapusang tuig nga gitambongan pagtungha, duha ka 2x2 nga litrato nga colored apan kuha sa puti nga background, ug duha ka lapis nga #2 alangs a pasulit.
Gani, matud ni Celino, mas mauna pa gani og process ang mga aplikante nga miani sa taas nga honors sa pagtungha.
Didto sa Kapihan sa PIA uban si Kadete Mateo Gambe Jr, taga Dagnawan Inabanga, gisaysay nila ang tulo ka natad sa eksaminasyon: English, Mathematics ug Abstract Reasoning.
Sa iyang upat ka tuig nga pagbansay, gibutyag ni Gambe nga dako kaayo ang iyang kausaban gikan sa usa ka hilomon nga bata ngadto na sa pagkat-on nga moharung sa mga kaestorya.
Dili lamang academic ang pagbansay sa PMA, lakip na niini ang physical, military ug ang paghulma sa karater ug kinaiya sa naglaum nga mahimong opisyal sa kasundalohan. (rahc/PIA-7/Bohol)
No comments:
Post a Comment