Mga miyembro sa Bohol media, nitambong sa 

Media Literacy seminar sa syudad sa Bacolod

BACOLOD CITY, Aug. 17 (PIA)--Ang mga miyembro sa Bohol media kauban usab sa mga miyembro sa mainstream media sa Dumaguete City, Metro Manila, Iloilo ug Bacolod, apil na sa mga bloggers, mass communication students ug information officers sa nagkadaiyang local government units ug national government agencies sa Negros Occidental nitambong sa Media Literacy Seminar niadtong Agosto 16.

Ang National Grid Corporation of the Philippines (NGCP) sa pakig-koordinar sa Negros Press Club (NPC) maoy sponsor sa maong seminar nga gipahigayon sa L’Fisher Hotel sa syudad sa Bacolod.

Si NPC President, Renato Duran sa iyang welcome message miingon nga tumong sa maong seminar ang pagtukpaw sa mas maayong kahibalo ug pagdayed sa malisod ug kritikal nga papel sa media ilabi na kalabot sa social media. 

Si Philippine Press Institute (PPI) Executive Director Ariel Sebelleno nituki sa topic nga “Detecting Fake News” diin iyang gihisgotan unsaon pagdipara sa mga pekeng balita sama sa pagsusi sa tinubdan niini, paghimo og visual assessment, pagtino sa nagsulat, pagtino sa kauyokang mensahe, pagsusi sa ‘About Us Section’ ug pagsusi sa spelling, grammar ug punctuation sa maong balita. 

Sa kinatibuk-an, gi-awhag niini ang tanan nga i-aplay ang “think before you click,” sa mga tigpakatap ug tiggama og pekeng balita kun fake news.

Samtang ang ABS-CBN reporter ug news anchor nga si Alvin Elchico nihisgot kalabot sa ‘Understanding Electricity Bills’ diin isip mga manunulat, giingong angay bantayan ang desisyon sa Energy Regulatory Commission (ERC), kalamidad nga maka-apekto sa suplay ug pagkapalong sa sugang dagitab, maintenance work nga makaingon sa pagkapalong sa suga sa pihong oras ug transmission nuisance o mga estruktura nga duol o ubos sa mga linya sa kuryente ug uban pa. (ecb/PIA7-Bohol)