Bird flu task force sa Bohol, 

padayong naglihok 

TAGBILARAN CITY, August 23 (PIA)--Padayong naglihok ang Bird Flu Task Force sa lalawigan diin nagtigom kini sa ikaduhang higayon kagahapon sa Reyna’s Haven and Restaurant ning syudad.

Kini bisan pa nga wala pa’y hulga sa bird flu sa lalawigan apan nagpadayon pa gihapon ang pag-monitor sa task force sa mga manokan ning lalawigan. 

Sa maong tigom, gitoki sa Bird Flu Executive Committee ang mga nagkalain-laing kalihokan sa task force ug ang mga bag-ong memorandum circular ug mga advisories gikan sa ubang ahensiya sa gobyerno.

Samtang gi-presentar usab atol sa maong tigom sa Provincial Health Office (PHO) ang kalabot sa avian influenza sa tawo.

Kahinomduman nga gilagdaan ni Gob. Edgar Chatto niadtong Agosto 14 ang Executive Order No. 21 nga nagmugna og Provincial Bird Flu Task Force sa lalawigan sa Bohol nga maoy motutok sa kahimtang sa mga manok, paglihok sa mga migratory birds ug bisan ang presyo sa mga manok sa kamerkadohan. 

Gibutyag ni Bohol Provincial Veterinarian Dr. Stella Marie Lapiz nga bisan wala pa’y natala nga kaso sa kalit nga pagkamatay sa manok sa lalawigan, bagsak presyo pa gihapon ang mga manok ug itlog. 

Giingong tungod kini sa kahadlok sa publiko sa sakit nga bird flu sa mga manok. 

Ning bag-o lang, gitugotan na sa Department of Agriculture (DA) ang pagpadala og mga poulty products gikan sa Luzon paingon sa Visayas ug Mindanao. (ecb/PIA7-Bohol)