Fish landing center, gitugyan

sa BFAR sa LGU-Baclayon

TAGBILARAN CITY, Aug. 23 (PIA)--Gitugyan na kagahapon sa buntag sa Bureau of Fisheries and Aquatic Resources (BFAR) ang Community Fish Landing Center (CFLC) sa lungsod sa Baclayon.

Ang simbolikong yawe sa CFLC gitunol mismo ni BFAR-7 Regional Director Dr. Allan Poquita ngadto ni Baclayon Mayor Benecio Uy nga nitunol usab niini sa mga kapunongan sa mangingisda'g mananagat sa maong lungsod.

Ang maong pasilidad nga nagkantidad og P3 milyones, gilakipan sa mga ekipos sama sa chest freezers, stainless steel display stalls, ice-plant, processing plants ug sakyanan.

Matud pa ni Dr. Poquita nga gawas sa ekipos ug mga kagamitang taban sa proyekto, mohatag usab ang BFAR sa mga bansaybansay aron magamit sa mga mangingisda'g mananagat sa ilang pagpadaghan sa ilang mga kuha.

Kini maggarantiya og kanunay nga may lab-as ug baratong presyo sa mga isda sa maong lugar nga mapalit sa mga lumolupyo niini ug mga kasikbit nga lungsod.

Samtang gibutyag ni Leo Bongalos, ang OIC Provincial Fishery Officer dinhi sa lalawigan sa Bohol nga ang CFLC sa Baclayon mao ang ika-7 nga gitugyan sa BFAR ug isunod niini ang sa lungsod sa Ubay.

Didugang usab ni Bongalos nga ang 2nd batch niini may 8 pa ka lungsod diiin ang mga lungsod sa Talibon, Jetafe ug Loon nagsugod na og trabaho.

Ug ang 3rd batch niini may pito ka lungsod diin may mga dokumento na ang uban samtang ang uban, nagkuha pa og mga ‘tenurial instrument’ diin ang local government unit maoy mo-comply niini. 

Ang maong fish landing center mahimo usab nga lugar diin mahimong magtapok ang mga mangingisda alang sa ilang mga tigom, pagbansay ug panag-ambit sa mga post-harvest equipment. (ecb/PIA7-Bohol)

Ang P3-milyong Community Fish Landing Center (CFLC) nga nahimutang sa Poblacion Bacalayon, gitunol sa Bureau of Fisheries and Aquatic Resources (BFAR) sa kagamhanang lokal sa Baclayon niadtong Agosto 22. (ecb/PIA7-Bohol)