Palasyo, mihangyo sa publiko nga likayan 

ang pagpakatap og sayop nga impormasyon

MANILA, August 22 (PIA)--Nanawagan ang Palasyo sa publiko nga likayan ang pagpakatap og mga sayop nga mga impormasyon kalabot sa avian flu outbreak sa nasod.

Kini ang gipagawas nga pahayag sa Malakanyang taliwala sa sitwasyon nga gi-atubang sa nasod karon human gi-kumpirmar sa Department of Agriculture (DA) nga may mga kaso na usab nga bird flu nga natala sa Nueva Ecija.

Giingong padayon nga gitutokan sa gobyerno ang problema ug nagtuo silang nahimong paspas ra ang paglihok sa mga opisyal sa problema.

Gani, nagtukod dayon ang DA og advance command post sa San Luis Pampanga ug San Nicolas Nueva Ecija nga may katakos nga mo-responde 24 oras sa mga kaso sa bird flu sa maong mga lugar.

Samtang giseguro ni Presidential Spokesperson Ernesto Abella nga may igong gidaghanon sa mga personal protective gear ug tambal ang mga sundalo nga nitabang alang sa paspas nga depopulation sa mga manok nga naapektohan sa avian flu.

Hingpit usab nga gibantayan sa gobyerno ang posibleng pagtakod og sakit sa tawo apan gitataw niini nga sa pagkakaron, wala pay natalang bird-to-human contamination sa bird flu sa nasod. (ecb/PIA7-Bohol)