Ekonomiya sa nasod,

nilambo sa 2nd qtr. sa 2017

MANILA, Aug. 18 (PIA)--Nilambo og 6.5 porsiyento ang ekonomiya sa nasod sa ikaduhang kwarter ning tuig.

Apan ang gross domestic product (GDP) expansion gikan sa buwan sa Abril hangtod sa Hunyo, mas nahimong hinay ang pag-uswag kun itandi sa 7.1 porsiyento sa parehong panahon niadtong niaging tuig.

Samtang mas paspas ang pinaka-ulahing pagtubo sa GDP sa 6.4 porsiyento nga natala sa unang kwarter sa 2017.

Una nang gipaabot ni Socioeconomic Planning Kalihim Ernesto Pernia nga ma-outperform sa ikaduhang kwarter sa GDP ang natala sa unang parte ning tuig.

Matud pa sa Kalihim nga nadugangan ang paggasto sa gobyerno ilabi na sa mga proyektong pang-imprastraktura.

Giingong nakatabang usab sa paglambo sa ekonomiya ang maayong performance sa sektor sa agrikultura apil na usab ang eksportasyon sa mga produktong pang-agrikultura.

Target sa gobyerno ang 6.5 hangtod 7.5 porsiyentong paglambo sa ekonomiya karong tuig. (ecb/PIA7-Bohol)