DepEd, mipasalig nga may confidentiality 

ang himuong random drug test 

TAGBILARAN CITY, Aug. 24 (PIA)--Gipasalig ni Department of Education (DepEd) Kalihim Leonor Briones sa mga magbabalaod nga dili magamit sa pagsang-at og kaso batok sa mga menor de edad ang himuong random drug testing sa mga estudyante sa pampubliko ug pribadong tunghaan.

Matud pa sa kalihim, ang himuong random drug test himuon aron mahibaw-an ang kadak-on sa problema sa droga sa mga tunghaan ug mahimoan kini og solusyon.

Gitataw ni Briones nga ang Department Order No. 40 nga naglatid sa guidelines sa himuong random drug test walay kalabotan sa duguon ug brutal nga anti-illegal drug operations sa kapolisan nga nikotlo na sa kinabuhi sa liboan apil ang pipila ka menor de edad.

Gipasabot sa Kalihim nga ang pagkatap sa droga sa mga tunghaan usa man ka “health matter” mao nga nakig-alayon na usab sila sa Department of Health (DOH) alang sa pagpahigayon og random drug test.

Ang random drug testing sa DepEd magsugod na karong Setyembre ug i-apil usab ang mga magtutudlo samtang mandatory drug testing usab ang sa mga kawani sa DepEd.

Una nang gisaway sa pipila ka militanteng magbabalaod ang Commission on Higher Education (CHED) sa plano niining mandatory drug test policy alang sa aplikasyon sa mga mosulod sa kolehiyo.

Kalabot niini, ang Provincial Federation of Parents Teachers Associations (Bohol PTA) mipadayag sa ilang suporta sa DepEd sa pagpatuman og random drug testing sa mga estudyante ug mga magtutudlo.

Matud pa ni Bohol PTA president Lanibel Labado, daghan nang estudyante karon ang nagpabaya sa ilang pagtuon tungod sa pagkalambigit sa ilegal nga droga maong kinahanglan ang maong drug testing sa pribado ug pampublikong mga tunghaan.

Gitumbok usab sa PTA opisyal nga krusyal ang pagpahigayon og drug testing sa kalamposan sa anti-drug campaign sa gobyerno nga maoy magpaundang sa dili maayong bisyo ug ilegal nga aktibidad nga nagsugod pa lamang. (ecb/PIA7-Bohol)