BOC, nanginahanglan 

og dugang kawani

TAGBILARAN CITY, July 31--Nanginahanglan ang Bureau of Customs (BOC) og usa ka gatos ug singkwenta (150) ka personnel aron mapakusog ang ilang manpower.

Sa gipagawas nga mensahe, miingon si Customs Commissioner Nicanor Faeldon nga kinahanglang masudlan ang halos 50% bakanteng posisyon sa ilang ahensiya.

Matud pa sa BOC website, modawat sila og aplikasyon hangtod sa Agosto 11.

Gitataw usab sa maong website nga dili na kinahanglang magdala pa og rekomendasyon o “external recommendations” ang mga aplikante kun mosumiter sa ilang mga dokumento ngadto sa Human Resources Management Division (HRMD) sa BOC.

“The BOC adheres to a more stringent process of hiring and promotion. We are looking for personnel who are skilled, educated and with integrity. External recommendations are not necessary and should not be among the documents to be submitted to the HRMD,” matud pa sa BOC website. 

Matud pa nga ang mga malampusong aplikante makadawat og suholan samtang mopaubos sa unom ka buwan nga pagbansay sa Philippine Customs Training Center (PCTC). (ecb/PIA7-Bohol)