DOLE, nipasidaan batok sa mga 

pekeng online page sa POEA

TAGBILARAN CITY, July 31--Nipasidaan ang Department of Labor and Employment (DOLE) sa mga overseas Filipino workers (OFWs) ug sa mga nagplanong mo-trabaho sa ubang nasod nga siguradohon una kun lehitimo ang mga bakanteng trabaho nga gimantala sa internet tungod kay nikatap na ang mga pekeng page sa Philippine Overseas Employment Administration (POEA) sa social media, ilabi na sa Facebook.

Gihimo ni DOLE Undersecretary ug POEA OIC Administrator Bernard Olalia ang pasidaan human sa mga nadawat nga taho sa POEA diin pipila ka dili otorisadong indibidwal ug grupo ang ilegal nga nigamit og pangalan ug logo sa POEA aron ipamantala ang mga bakanteng trabaho sa ubang nasod sama sa Australia, Canada, Germany, Japan, New Zealand, ug sa Estados Unidos. 

Gihinganlan sa POEA ang ubang dili lehitimo ug pekeng pahina sa Facebook sama sa Donald HRserv, POEA Jobs Online, OFW POEA Jobs Abroad, POEA Jobs Abroad, POEA Job Hiring USA, POEA Job Hiring Australia, POEA Job Hiring UK, POEA Job Agency Hiring, POEA Trabaho Abroad Hiring, POEA Jobs in Dubai, Work Abroad-POEA Licensed Company, ug POEA Accredited Licensed Agency.

Matud pa ni Olalia nga ang mga namantala nga bakanteng trabaho sa social media wala naberipika ug gi-aprobahan sa POEA mao nga gipahinumdoman ang publiko nga siguradohon una kun lehitimo ang mga bakanteng trabaho o bisan ang mga recruitment agency pinaagi sa pagsusi sa official website sa POEA nga www.poea.gov.ph/.

Gitataw usab niini nga ang official POEA Facebook account sa POEA mao lamang ang www.facebook.com/mypoea ug www.facebook.com/poea.official. Kining maong mga pahina adunay marka nga check nga gibiripika sa Facebook.

Alang sa mga pangutana, dugang impormasyon aron maberipika kun lehitimo ang mga bakanteng trabaho, bisan ang mga recruitment agency, ang publiko mahimong motawag sa hotline number sa POEA sa 7221144 ug 7221155. (ecb/PIA7-Bohol)