Bonus ug allowance sa mga GOCC’s 

gipahunong una ni Duterte

MANILA, Aug. 1--Gipahunong una ni Presidente Rodrigo Roa Duterte ang pagpatuman sa Compensation and Position Classification System alang sa mga kawani sa mga Government Owned and Controlled Corporations (GOCCs) nga una nang gipatuman sa administrasyong Aquino ubos sa Executive Order No. 203.

Ubos sa gipagawas nga Executive Order No. 36 ni Duterte, gimando usab niini ang pagpahigayon og review sa mga bonus ug allowance nga ginadawat sa mga empleyado sa mga GOCC.

Tungod sa mga dagkong allowances, benefits ug mga insentibo nga ginadawat sa mga kawani sa GOCC’s ilabi na sa mga opisyal niini, nakitaan kini og panginahanglang e-review, matud pa ni Senior Deputy Executive Secretary Menardo Guevarra. 

Samtang suspendido ang EO 203 ug gipaubos sa review ang mga allowances, mahimong ipatuman ang Salary Standardization Law sa suholan sa mga kawani sa GOCCs.

Kahinumdoman nga sa iyang SONA niadtong Hulyo 24, miingon ang Presidente nga walay mapaabot nga dugang bonus ug suholan ang mga empleyado sa mga GOCC ubos sa iyang termino. (ecb/PIA7-Bohol)