Tax-free program sa 

BOC, gisugdan na

TAGBILARAN CITY, Aug. 2--Human ang pila ka buwan nga pagkalangay, gisugdan na sa Bureau of Customs (BOC) ang tax-free program niini alang sa mga balikbayan boxes.

Kini nagpasabot nga mahimo nang makapadala ang mga Overseas Filipino Workers (OFWs) og tulo ka balikbayan boxes matag tuig nga walay buhis apan dili angay molapas sa kantidad nga PP150,000 ang sulod sa maong tuig.

Magamit lamang kining programa sa BOC sa mga "Qualified Filipinos While Abroad", o ang mga OFWs nga sertipikado sa Department of Labor and Employment (DOLE) ug Philippine Overseas Employment Administration (POEA); mga Pilipinong nagpuyo na sa ubang nasod apan nagpabilin pa gihapon ang ilang Filipino citizenship; ug mga Pilipinong kasamtangang nagpuyo sa ubang nasod.

Aron mahimong kwalipikado sa tax-free shipping, kinahanglang mopasa ang mga aplikante og xerox copy sa ilang passport; information sheet nga gikan sa website sa BOC; listahan sa mga sulod sa ilang balikbayan box; ug resibo o invoice sa mga gamit kun asa kini gipadala.

Apan tungod kay daghang dili mo-kumpiyansa sa pagpasa og Xerox copy sa passport tungod sa mga kaso sa identity theft ug tampering, miingon ang tigpamaba sa Door-to-Door Consolidation Association of the Philippines nga si Marie Roxas nga mahimo usab mopasa og bisan unsang identification document. (ecb/PIA7-Bohol)