PDEA, magbutang og bag-ong unit 

sa mga pantalan sa tibuok nasod

TAGBILARAN CITY, Aug. 2--Aron mapugngan ang pagsulod sa mga ilegal nga droga sa nasod, magbutang na ang Philippine Drug Enforcement Agency (PDEA) og Seaport Interdiction Unit (SIU) sa tanang regional office niini sa tibuok nasod.

Matud pa ni PDEA Director General Isidro Lapeña, ang maong lakang nahisulod sa Memorandum Circular No. 2017-030 nga gilagdaan niini niadtong Hulyo 24, 2017.

Apil sa responsibilidad sa mga SIU ang pugngan ang pagsulod sa ilegal nga droga ug uban pang ilegal nga kontrabando, imbestigahan ang bisan unsang aktibidad nga may kalambigitan sa droga sa pantalan ug pag-proseso sa mga impormasyon sa mga pasahero ug mga shipping company nga posibleng adunay koneksiyon sa pagsulod sa droga o mga raw material sa paghimo niini.

Kahinumdoman nga kaniadtong tuig 2008, 744 ka kilo sa methamphetamine hydrochloride o shabu ang nasakmit sa Subic, Zambales ug 433 kilo usab nga shabu ang nasakmit niadtong tuig 2014.

Samtang usa ka floating shabu laboratory ang nadiskobrihan ug giguba usab sa kadagatan duol sa Zambales kaniadto. (ecb/PIA7-Bohol)