Drug raid sa mga Parojinog, lehitimo; pasidaan 

sa mga mayor, nalambigit sa drugs trade – Palasyo

MANILA, Aug. 1--Usa ka kusog nga mensahe ang angay hunahunaon sa mga local chief executives, opisyal sa gobyerno ug uban pang nalambigit sa ilegal nga droga ang gihimong pagsilbi sa search warrant sa mga operatiba kang Ozamis Mayor Reynaldo Parojinog nga nisukol ug napatay sa mga awtoridad kauban ang 14 pa.

Matud pa ni Presidential Communications Ope­rations Office (PCOO) Kalihim Martin Andanar, pagmatuod lamang kini nga walay gipili ang kampanya sa administrasyon batok sa ilegal nga droga.

Gipahayag ni Andanar nga gagmay o dagku man nga personalidad, basta nalambigit sa ilegal nga droga, giingong himuon sa gobyerno ang angayan nga proseso aron mapanubag ang mga nalambigit niini.

Matud pa sa kalihim, “no sacred cows” ang polisiya sa administrasyong Duterte kalabot sa kampanya niini batok sa ilegal nga droga ug gipatuman kini og patas.

Dugang pa ni Andanar nga wala nausab ang pagtratar sa Presidente sa mga local government officials nga nalambigit sa ilegal nga droga, operator man kini o protektor.

Una nang niingon si Philippine National Police (PNP) Chief Ronald dela Rosa nga isunod na usab sa ilang operasyon ang uban pang mga personalidad nga naa sa drug list ni Presidente Duterte.

Kahinumdoman nga mismong si Presidente Duterte ang nihingalan kaniadto kang Mayor Parojinog nga apil sa mga nalambigit sa ilegal nga droga, kauban ang iyang anak nga si Vice Mayor Nova Parojinog. (ecb/PIA7-Bohol)