DILG, nimando sa mga LGUs sa 

pagmugna og Smoke-Free Task Force 

TAGBILARAN CITY, Aug. 3--Gimanduan sa Department of the Interior and Local Government (DILG) ang mga local chief executives sa pagmugna og smoke-free task forces.

Tuyo niining hapsay nga mapatuman ang nationwide smoking ban o ang pagbawal sa pagpanigarilyo sa mga pampublikong lugar.

Ang maong balaod gilagdaan ni Presidente Rodrigo Duterte ug nahimong epektibo niadtong Hulyo 22, 2017.

Matud pa ni DILG Assistant Secretary for Plans and Programs Epimaco Densing III, ang task force maoy mahimong tigdumala sa pagpanakop sa mga dili mosunod sa smoking ban.

Gipasiguro sa DILG nga ang mga task force makig-alayon sa Philippine National Police (PNP) aron masigurong hapsay ang pag-aresto sa mga dili mosunod sa balaod.

Gi-awhag usab sa DILG ang publiko nga mahimong parte niining kabag-ohan pinaagi sa pagsumbong sa mga otoridad sa mga indibidwal nga nanigarilyo sa mga pampublikong lugar. (ecb/PIA7-Bohol)