Duterte ug liderato sa 

MILF, nagpulong og balik

MANILA, Sept. 5 (PIA)--Nakig-pulong og balik si Presidente Rodrigo Duterte sa mga opisyal sa Moro Islamic Liberation Front (MILF) sa Malakanyang kagahapon.

Kauban sa maong pulong sila MILF Chair Al Haj Murad Ebrahim, Bangsamoro Transition Commission (BTC) Chair Ghazali Jaafar ug MILF peace implementing panel Chair Mohagher Iqbal.

Nitambong usab sa maong pulong sila BTC Commissioner Abdulraof Macacua ug BTC Executive Director Esmael Pasigan.

Sa habig usab sa gabinete ni Duterte, nitambong sila Presidential Adviser on the Peace Process Jesus Dureza, National Security Adviser Hermogenes Esperon Jr. ug Interior and Local Government Acting Secretary Catalino Cuy.

Matud pa ni Presidential Spokesman Ernesto Abella, sa maong pulong giseguro ni Duterte sa MILF nga executive priority bill ang BBL, taliwala sa mga kabalaka sa pipila ka grupo nga walay sponsor ang maong balaodnon sa Kongreso.

Giingong gi-konsiderar usab sa Presidente ang BBL isip mahinungdanong balaodnon nga kinahanglan alang sa umaabot ug gipangandoy nga kalinaw. (ecb/PIA7-Bohol)

================

Ban sa shipment sa mga manok 

ug itlog,gitangtang na sa DA

MANILA, Sept. 5 (PIA)--Padayon nang gitangtang sa Department of Agriculture (DA) ang ban sa shipment sa mga manok, itlog ug uban pang poultry products sa tibuok nasod.

Giseguro ni DA Kalihim Manny Piñol nga sulod sa otsenta ka adlaw, wala na’y bird flu ug nasumpo na ang avian influenza sa Pilipinas.

Sa usa ka memorandum nga gilagdaan ni Piñol, gimando niini ang paglibkas sa ban sa pag-biyahe sa mga poultry products sa tibuok nasod.

Si Piñol nagkanayon nga ilang repasuhon ang daang protocol nga gigamit sa DA nga nakaingon sa dakong pagka-alkansi sa mga poultry raisers sa nasod.

Apan gitataw usab sa kahilim nga gibayran na nila ang tanang naapektohan sa maong avian influenza outbreak sa nasod. (ecb/PIA7-Bohol)

==============

Visayas grid, gibutang sa 

red alert status sa NGCP

TAGBILARAN CITY, Sept. 5 (PIA)--Gi-ayo na sa National Grid Corporation of the Philippines (NGCP) ang naapektuhang converter station sa Ormoc, Leyte.

Kini human gibutang sa red alert sa NGCP ang Visayas Grid tungod sa generation deficiency sa mga geothermal plant tungod sa nahitabong linog ning bag-o lang.

Tungod niini, nikabat sa 1,816 megawatts ang natalang peak demand sa Visayas grid nga sobra sa available capacity niini nga 1,721 megawatts

Nagsugod ang red alert mga alas 6:00 kagabii ug nilanat kini hangtod alas 9:00 usab kagabii mao nga pipila ka lugar sa Visayas ang nawad-an og suplay sa kuryente. (ecb/PIA7-Bohol)