Larawan ni Duterte ug mga elected, appointed opisyal, 

ipatangtang na sa tanang buhatan sa gobyerno

MANILA, Sept. 28 (PIA)--Gimanduan na ni Presidente Rodrigo Duterte ang tanang buhatan sa gobyerno apil na ang mga government-owned and controlled corporations (GOCCs), State Universities and Colleges (SUCs) ug tanang pampublikong tunghaan sa tibuok nasod nga tangtangon na ang iyang mga larawan ug alisdan kini og mga larawan sa mga nasudnong bayani.

Base sa Memorandum Circular Number 25 (MC 25), gawas sa iyang mga larawan, ipatangtang usab ni Presidente Duterte ang mga larawan sa mga opisyal sa gobyerno sa tanang mga opisina sa gobyerno ug alisdan kini og mga larawan sa mga nasudnong bayani.

Ang mga larawan sa mga bayani nga mahimong ibutang sa mga buhatan sa gobyerno naglakip nilang Dr. Jose Rizal, Andres Bonifacio, Emilio Aguinaldo, Apolinario Mabini, Marcelo H. del Pilar, Juan Luna, Melchora Aquino, Gabriela Silang, Lapu-Lapu, Father Jose Burgos, Father Mariano Gomez, Father Jacinto Zamora, Emilio Jacinto ug Jose Abad Santos.

Kini nagpasabot nga dili na angay makita ang mga larawan sa mga politiko ug uban pang opisyal sa gobyerno sa ilang mga buhatan.

Nakalatid sa MC 25 nga tuyo niining mapalapad pa ang nasyonalismo sa mga Pilipino ug ang pagtahod sa mga bayani aron mahatagan og kamahinungdanon ang kasaysayan sa atong nasod. (ecb/PIA7-Bohol)