Election period, nagsugod na; nationwide 

checkpoint ug gun ban, gipatuman na

TAGBILARAN CITY, Oct. 2 (PIA)--Isip pagpangandam sa Barangay ug Sangguniang Kabataan elections sa Oktubre 23, gisugdan na sa Commission on Elections (Comelec) kagahapon ang pagpahigayon sa nationwide checkpoints ug gun ban.

Kini tungod kay sugod kagahapon, Oktubre 1, mao man ang unang adlaw sa election period.

Sa usa ka pahayag, miingon si Bohol Provincial Election Supervisor Atty. Eliseo Labaria nga sa pagsugod sa election period kagahapon, ipatuman na ang nagkalain-laing prohibisyon o pagdili nga may kalabotan sa ipahigayong piniliay.

Gawas sa checkpoint ug gun ban, apil pa sa mga gibawal ang: paggamit og security personnel o bodyguard sa mga kandidato gawas lamang kun may pagtugot kini sa Comelec; pagpanghadlok, pagpuwersa sa bisan kinsang opisyal ug kandidato samtang gipahigayon ang mga trabahong may kalabotan sa piniliay; pagbag-o sa lugar sa election precinct o paghimo og bag-ong presinto; ug pagmugna og mga reaction forces o strike forces o mga susamang kalihokan.

Giingong mahimong magresulta sa pagkabilanggo sa dili molapas sa unom ka tuig, diskwalipikasyon sa paggunit og puwesto sa gobyerno ug dili na tugotang maka-botar ang bisan kinsang molapas sa mga election-related offenses.

Gipahinumdom usab sa Comelec nga ang pagsugod sa filing sa Certificates of Candidacy (CoC) sa Oktubre 5 na ug molanat kini taman sa Oktubre 11.

Samtang ang campaign period usab magsugod sa Oktubre 12 ug matapos sa Oktubre 21.

Kini bisan pa sa nag-ungot na sa Malakanyang ug posibleng lagdaan ni Presidente Rodrigo Duterte ang balaodnong pag-oktaba sa piniliay.

Gipasabot ni Labaria nga hangtod wala pa’y gilagdaang balaod, magpadayon ang preparasyon sa ilang buhatan alang sa piniliay sa Barangay ug SK. (ecb/PIA7-Bohol)

===============

DTI Bohol, nagsaulog sa 

2017 Consumer Welfare Month

TAGBILARAN CITY, Oct. 2 (PIA)--Ang Department of Trade and Industry (DTI) Bohol Provincial Office nagsaulog karong bulan sa Oktubre sa Consumer Welfare Month nga nagdala sa tema nga: “Consumer Rights in the Digital Age”.

Ang DTI Bohol Provincial Office nakig-tambayayong sa Consumer Watch-Bohol, Inc. (CWBI) ug sa Bohol Youth Consumer Movement (BYCM) alang sa kasaulogan ning tuiga. 

Gibuksan ang usa ka buwan nga selebrasyon kagahapon, Oktubre 1 pinaagi sa “Consumer 5k Fun Run 2017” dungan usab sa ubang probinsiya ug rehiyon sa tibuok nasod nga gisalmotan sa mga konsumedor, estudyante, mga kawani sa gobyerno ug pribadong sektor.

Sa Oktubre 5, 2017, ipahigayon ang ika-5 nga Consumer Youth Summit sa JJ’s Seafood Village ning syudad.

Ang maong summit bukas sa mga estudyante gikan sa mga unibersidad ug kolehiyo sa syudad sa Tagbilaran diin ang mga gidapit nga mamumolong motuki kalabot sa eCommerce ug balaod sa Anti-phishing ug anti-scam.

Samtang sa Oktubre 13, 2017, ipahigayon ang seminar kalabot sa Product Standards Regulation and Conformance diin tinguha niining makahatag og update sa local business hardware ug construction companies ug mga establisemento sa pinakabag-ong product standards department administrative orders ug mga mahinongdanong balaod ug patakaran.

Pagatak-opan ang kasaulogan sa 2017 Consumer Month pinaagi sa “Consumer Quiz Bowl” nga ipahigayon sa Oktubre 25, 2017 didto sa ICM Activity Center diin bukas kini sa tanang estudyante sa sekondarya gikan sa mga public high schools ning lalawigan.

Ang mga mananaog, makadawat og ganting salapi nga nagkantidad og P 2,000.00, P 1,500.00, ug P 1,000.00.

Alang sa dugang kasayoran kalabot sa mga kalihokan sa Consumer Welfare Month, mahimong motawag o mo-text lamang sa DTI Bohol Provincial Office sa ilang mga numero nga 501-8260, 412-3533, o 09173088859. (ecb/PIA7-Bohol)