Tulo ka Negosyo Centers

buksan sulod 1 ka buwan

TAGBILARAN CITY, October 2 (PIA)--Gibuksan ang duha pa ka Negosyo Centers sa Bohol, samtang gipa-abut ang usa pa ka center nga buksan sa sunod semana. 

Niadtong Septembre 29, gibuksan ang buhatan nga magtubag sa mga panginahanglan sa mga buot mamuhunan sa ginagmay nga negosyo sa Panglao. 

Sa pagkahapon, gibuksan usab ang lain nga Negosyo Center sa lungsod sa Sevilla, ang ika napulo og usa nga susamang pasilidad nga natukod na sa Bohol aron pag-agak sa mga mamumuhunan. 

Sa sunod semana, laing Negosyo Center ang buksan sa Inabanga, Bohol. 

Matud ni Department of Trade and Industry Regional director Asteria Caberte, ang Negosyo Center usa ka buhatan nga naa sa kalungsuran nga manghatag sa libre nga tambag, magtabang sa mga mamumuhunan sa pagkuhag permits sa ilang mga negosyo. 

Motabang usab ang pasilidad sa pag-agak sa mamumuhunan ngadto sa pag-asenso ug magtanyag sa libre nga mentoring aron ang mga namuhunan makat-on sa mga pamaagi aron mas mapalig-on pa ang negosyo. 

Namugna gikan sa Republic Act 10644 o Go Negosyo Act, ang NCs maoy manguna sa pagpasayon sa pagsugod og negosyo pinaagi sa pag-agak sa mga mamumuhunan ug pagtanyag kanilag serbisyo sa pagparehistro sa ilang negosyo, paghatag og mga tambag, mga kasayuran kabahin sa dagan sa negosyo sa gawas ug pagpa-ugmad sa negosyo. 

Gani, gipahinumdom ni Caberte nga segun sa balaod, 15 minutos lamang ang tagal kon ang negosyo nakapalista na sa NC, ug makuha na dayon ang Business Name. 

Mainiton usab nga gidawat ni Mayor Nila Montero ang kaugmaran, human pundohi sa DTI ang pag-ayo sa lugar nga yak-an sa pasilidad. 

Ang DTI na mismo usab ang minghatag sa business counselor nga modumala sa NC Panglao. 

Sa pagkapalis, gisubhan usab ang ila napulo ug usa ka NC didto sa Sevilla.

Segun sa DTI, buksan na usab ang ika 12 nga NC sa Bohol sa sunod semana. 

Una na nga gibuksan ang NC sa DTI Bohol ug sa BIPC. Pipila ka buwan ang milabay, gibuksan na usab ang mga susamang pasilidad sa Loon, Talibon, Ubay, Tubigon, Carmen, Jagna ug Loboc. (rahc/PIA-7/Bohol)

Gipasalig sa DTI nga pinaagi sa Negosyo Centers, maagak na ang mga gagmay nga mamumuhunan nga kasagaran dili makalahutay sa lisud nga kalibutan sa negosyo. (rahc/PIA-7/Bohol)