BFAR mo-abli sa fish-tours, 

pasilidad buksan sa turista

TAGBILARAN CITY, October 2 (PIA)--Maghimo ang Bureau of Fisheries and Aquatic Resources (BFAR) og mga lugar alang sa pagsilbi sa mga turista didto sa ilang Multi-Species Hatchery sa Sinandigan. 

Kini maoy gibutyag ni BFAR Regional Director Allan Poquita, dihang napangutana unsang paagi nga ang ahensya maka-abag sa turismo nga maoy usa dagkog kasaligang economic drivers sa Bohol. 

Ang BFAR Multi-Species Hatchery sa Sinandigan usa sa duha ka pasilidad sa BFAR nga nia sa Bohol; ang usa niini naa sa Calape. 

Sa Sinandigan, sa lungsod sa Ubay, ang BFAR facility maoy nagpapusa ug nagpadagko sa pompano, pugapo, danggit, kitong, bangus ug pipila pa ka matang sa isda ug lambay nga may taas og presyo sa merkado. 

Matud ni Poquita, kining pasilidad maoy gisaligan sa mga commercial nga nagdumala sa mga fish pens dinhi sa Bohol alang sa ilang lokal nga supply. 

Sa pasilidad sa Sinandigan, scientific ang pagpapusa sa mga itlog sa isda nga kon naa pa sa lawod, walay kasegurohan nga modagko pa ug nga di makuha sa gagmay pa kini. 

Matud sa BFAR, subay usab sa direktiba sa Central nga Buhatan sa BFAR sa pagpahimutang sa mga pasilidad nga maka-serbisyo sa mga turista sa lugar diin sikat ang turismo, ilang gipahiluna na ang laraw sa pagbukas sa pipila ka lugar sa pasilidad alang sa turismo. 

Segun sa laraw nga gibutyag ni Poquita, maghimo sila og buhing aquarium sa mga isda nga ilang gipapusa, mga lugar kapamaslan, kan-anan ug luto-anan sa mga nabingwit nga isda ug pagsuroy nagdto sa mga proseso kon giunsa pagpapusa sa isda. 

May gakit usab ug fishcage ang Sinandigan nga mahimong suroyon sa mga bisita aron makita didto ang gipatambok nga mga isda sa dilio pa kini hingpit nga ibaligya ngadto sa mga commercial fish growers ug cage operators. 

Niining bag-o lamang, gibuksan usab sa BFA ang ilang pasilidad alang sa research sa lambaya ron tun-an unsaon kini pagpadaghan. (rahc/PIA-7/Bohol)

Buksan sa BFAR dinhi nga pasilidad sa Sinandigan Ubay alang sa mga turista, unang pahayag ni BFAR 7 Chief Alana Poquita aron makadugang ang BFAR sa pag-alagad sa katawhan pinaagi sa pagpakatap sa kasayuran kabahin sa mga katigayunan sa kadagatan. (rahc/PIA-7/Bohol)