DILG, nipasidaan batok sa mga brgy. kapitan 

nga dili magpahigayon og Brgy. Assembly 

MANILA, Oct. 3 (PIA)--Nipasidaan ang Department of the Interior and Local Government (DILG) batok sa mga barangay captain nga mapakyas sa pagpahigayon og barangay assembly karong Oktubre 8.

Gihimo ni DILG Officer-in-Charge Catalino Cuy ang pasidaan atubangan sa init nga deliberasyon sa pag-oktaba sa barangay elections ug posibleng holdover sa kasamtangang mga opisyal sa barangay.

Giingong sayo pa lamang, nagpatuyok na ang mga barangay captain og memorandum circular sa mga punong barangay sa tibuok nasod kalabot sa pagpahigayon og barangay assembly.

Ang bisan kinsang dili mosunod niini mahimong mag-atubang og kasong administratibo.

Gipasabot ni Cuy nga ang administrative complaint mahimong iduso sa bisan kinsang residente sa baragay, concerned citizen ug bisan governmental o non-governmental entity sa Sangguniang Panglungsod o Sangguniang Bayan.

Gitumbok usab ni Cuy ang Local Government Code diin nakalatid nga angay ang barangay assembly ipahigayon sa dili moubos sa duha ka higayon matag tuig aron madungog ug mahisgotan ang mga problema sa barangay.

Karong ikaduhang semester ning tuig, ang tema nga napili sa National Barangay Operations Office (NBOO) mao ang “Nagkakaisang Barangay: Lakas ng Kampanya Kontra sa Iligal na Droga, Krimen at Katiwalian. Makiisa! Makilahok! Makialam! (ecb/PIA7-Bohol)

==============

Drug suspects, mahimo nang isum-

bong pinaagi sa mga drop boxes

TAGBILARAN CITY, Oct. 3 (PIA)--Gipatuman na karon sa tibuok nasod ang paggamit sa mga drop boxes diin mahimong isumbong sa mga awtoridad ang mga drug suspect.

Pinaagi sa Memorandum Circular 2017-112 sa Department of Interior and Local Government (DILG) nga gipagawas niadtong Agosto 29, gimugna ang community based program nga Mamamayang Ayaw sa Anomalya, Mamamayang Ayaw sa Iligal na Droga (Masa Masid) aron batokan ang korapsiyon, krimen, ilegal nga droga, ekstremistang grupo ug uban pang hulga sa seguridad sa nasod.

Gihimo kini pinaagi sa pagbutang og mga drop box sa mga munisipyo, syudad ug mga barangay diin mahimong ibutang sa publiko ang ilang sumbong.

Gawas sa drop boxes, mahimo usab ipaabot ang mga mahinungdanong impormasyon pinaagi sa gibutang nga mga linya sa telepono, cellphone numbers ug email address.

Pangunahan sa mga opisyal sa barangay, chairperson sa barangay committee ug representante sa Civil Society Group ang pagkolekta sa mga impormasyon nga ipaagi pa usab sa beripikasyon. (ecb/PIA7-Bohol)

===============

FDA, nipasidaan sa publiko sa pagkatap

sa mga dili rehistradong HIV testing kit

TAGBILARAN CITY, Oct. 3 (PIA)--Nipasidaan ang Food and Drugs Administration (FDA) sa publiko sa pagkatap sa mga dili rehistradong self-test kits alang sa human immunodeficiency virus (HIV) nga gibaligya karon.

Sa duha ka pahinang advisory nga gilagdaan ni FDA Director General Nela Charade Puno, partikular nga nipasidaan ang ahensya batok sa medical device product nga One Step Cassette Style HIV 1 + 2 Rapid Screen Test (whole blood).

Kini human napamatud-an sa gipahigayong post-marketing surveillance sa FDA nga ang maong produkto wala ni-agi sa registration process sa ahensiya ug wala usab kini nahatagi og saktong Certificate of Product Registration.

Pahinumdom pa sa FDA nga ubos sa Republic Act No. 9711 o Food and Drug Administration Act of 2009, gidili ang paghimo, pag-angkat, pagbaligya ug pagtanyag og bisan unsang health product nga dili rehistrado sa FDA.

Kalabot niini, gipalihok sa FDA ang mga lokal nga kagamhanan ug mga tigpatuman sa balaod nga ipasigurong dili mabaligya sa ilang hurisdiksyon ang maong produkto. (ecb/PIA7-Bohol)