Pagpahigayon sa Asia Media Summit 2019 sa 

PH, hingpit nang gipangandaman sa PCOO

MANILA, Oct. 4 (PIA)--Hingpit na ang pagpangandam sa Presidential Communications Operations Office (PCOO) sa ipahigayong Asia Media Summit sa 2019 dinhi sa Pilipinas.

Matud pa ni PCOO Kalihim Martin Andanar, kini ang labing unang higayon nga dalhon sa atong nasod ang maong summit nga mahimong mapuslanon sa tanang brodkaster ma-radyo o telebisyon man apil na ang mga naa sa pribadong media company.

Dugang pa ni Andanar, pagpakita usab kini nga dakong buhi pa ang broadcast industry sa nasod mao nga maayong pahimoslan usab kini sa mga brodkaster.

Samtang gibutyag usab sa kalihim nga padayon ang upgrading sa mga pasilidad ug mga ekipo sa mga estasyon sa radyo ug telebisyon sa gobyerno diin gipaabot nga mokabat sa 50 ka FM stations sa tibuok nasod ang buksan sa sunod tuig tungod sa gihatag nga pondo sa Kongreso.

Matud pa ni Andanar nga sa tunga-tunga sa sunod tuig, mapaabot na ang mas kusog nga signal sa PTV-Manila nga mahimo nang makig-dungan sa mga dagkong TV network.

Gipasabot sa kalihim nga angay lamang nga mabalik sa publiko nga nagbayad og saktong buhis ang saktong serbisyo alang kanila.

Gitumbok pa ni Andanar nga walay laing tuyo ang PCOO kun dili ang mahatag ang saktong kabag-ohan nga nahisubay sa gusto ni Presidente Rodrigo Duterte. (ecb/PIA7-Bohol)

==============

Barangay ug SK elections,

gi-uswag sa Mayo 2018

MANILA, Oct. 4 (PIA)--Gipagawas na sa Malakanyang ang gilagdaang balaod ni Presidente Rodrigo Duterte nga nag-uswag sa Barangay ug Sangguniang Kabataan (SK) elections nga gitakda na unta karong Oktubre 23.

Gilagdaan ni Presidente Duterte ang Republic Act 10952 o An act postponing the October 2017 Barangay and Sangguniang Kabataan elections.

Nakalatid sa bag-ong balaod nga ang Barangay ug SK elections nga angay unta ipahigayon sa Oktubre 23, sa ikaduhang Lunes sa buwan sa Mayo tuig 2018 na ipahigayon.

Nakalatid usab sa maong balaod nga “hold-over” o magpabilin sa posisyon ang mga nakalingkod nga opisyal sa Barangay ug SK, bisan ang mga opisyal sa barangay nga gibutang nga ex-officio official sa Sangguniang Bayan ug Sangguniang Panlalawigan.

Matud pa usab sa bag-ong balaod nga adunay gahom ang president pinaagi sa Executive Secretary nga mag-appoint og mga bag-ong opisyal sa barangay partikular sa mga opisyal nga naapil sa narco-list.

Samtang i-konsiderar nga 'continuing appropriation' ang mokabat sa P6.9 bilyon nga pondong gigahin sa gobyerno alang unta sa eleksiyon karong Oktubre 23.

Epektibo dayon kining bag-ong balaod human kini mapamantala sa Official Gazette ug sa mga pahayagang adunay national circulation. (ecb/PIA7-Bohol)

===============

3rd CV Coop Congress,

ipahigayon sa Bohol 

TAGBILARAN CITY, Oct. 4 (PIA)--Ang Probinsiya sa Bohol maoy host sa ika-3 nga Central Visayas Cooperative Congress nga ipahigayon sa Oktubre 5-7, 2017 sa Bohol Tropics Resort, ning syudad.

Nagdala sa tema nga: “In Cooperativism, All Are Included, No One Should Be Left Behind” (Sa Kooperatiba, Tanan Apil, Walay Angay Mabiyaan), ang mga kooperatiba, ahensiya sa gobyerno sa rehiyon, apil na ang mga opisyal gikan sa Cooperative Development Authority (CDA), Regional Cooperative Development Council (RCDC) ug mga opisyal sa nasudnong kagamhanan gipaabot nga motambong niining kalihokan.

Isip pagbukas sa tulo ka adlaw nga congress, usa ka press conference ang ipahigayon ugma, Oktubre 5 sa alas 11:00 sa buntag didto sa Flamingo Conference sa Bohol Tropics. 

Motambong sa maong press conference sila CDA Chairman Orlando Ravanera, RCDC-7 Chairperson Betta Socorro Solera ug Provincial Cooperative Development Council (PCDC) Officer, Atty. Benjie Arcamo.

Samtang ang mga pinasidunggang dinapit sa congress naglakip nilang Cabinet Secretary Leoncio Evasco Jr., ug Sen. Benigno “Bam” Aquino IV. 

Ang Buwan sa Kooperatiba kun Cooperative Month gisaulog matag buwan sa Oktubre matag tuig sa Pilipinas agi og pagsunod sa Presidential Proclamation 493, series of 2003. 

Ang tema sa 2017 Cooperative Month mao ang:“Cooperatives: Empowering the Poor and the Vulnerable Towards Job Creation and Poverty Eradication”. 

Agi og pagpa-usbaw sa kahibalo kalabot sa kooperatiba, ang tanang kooperatiba gi-awhag sa paglusad og mga kalihokan sa pagtimaan sa kamahinungdanon sa Buwan sa Kooperatiba kun Cooperative Month. (ecb/PIA7-Bohol)