PESO, gi-awhag nga hingosgan ang pagdumala 

sa pag-empleyo sa lokal nga kagamhanan

BOHOL, Oct. 5 (PIA)--Nanawagan ang Department of Labor and Employment (DOLE) sa tanang Public Employment Service Offices (PESOs) nga hingosgan ang pagdumala sa pag-empleyo sa mga lokal nga kagamhanan alang sa pagmugna og trabaho sa kabaryohan.

Kining panawagan gihimo ni DOLE Kalihim Silvestre Bello III atol sa bag-o lang gipahigayon nga panagtapok sa mga PESO manager ug kawani sa pagpanguna sa PESO Managers Association of the Philippines (PESOMAP), mga magbabalaod, opisyal sa lokal nga kagamhanan ug opisyal sa DOLE sa pagsaulog sa ika-17 nga National PESO Congress sa Cauayan, Isabela.

Base sa Trabaho, Negosyo, Kabuhayan (TNK) nga kaubang gidumala sa labor ug trade ug industry department, ang tema karong tuig mao ang: “Trabaho, Negosyo at Kabuhayan–Matatag na PESO, Kaagapay ng Bawat Pilipino.”

Kining tinuig nga panagtapok usa ka higayon alang sa mga PESO sa tibuok nasod nga ipa-ambit ug tun-an ang mga ‘best practice’ sa paghatag og serbisyo sama sa paghatag og labor market information, referral ug placement, career guidance ug employment coaching, livelihood ug manpower development, training, ug skills registry updating ug maintenance.

Gitumbok ni Bello ang mahinungdanong papel sa PESO, ilabi na sa kinatibuk-ang implementasyon sa TNK sa sunod tuig diin ang oportunidad sa trabaho ug negosyo halapad nga ihatag sa mga lokal nga kagamhanan.

Kini base sa Blueprint for Decent Employment and Entrepreneurship nga nagtinguhang makamugna og 7.5 milyong trabaho sa 2022, partikular sa key employment generating sector sama sa manufacturing, construction, tourism, IT-BPM, transportation ug logistics, ug wholesale ug retail.

Gawas sa pagdumala sa pag-empleyo, mahimong dalan usab ang PESO alang sa ‘DOLE Clinics’ – usa ka mekanismo aron mas mapaduol ang DOLE sa komunidad.

Ang National PESO Congress ginahimo matag Oktubre kada tuig dungan sa paghatag og pasidungog sa Best PESO Award, usa ka tinuig nga pag-ila sa mahinungdanong kontribusyon ug dalaygong buhat sa PESO sa pagdumala sa programang pang-empleyo sa DOLE. (ecb/PIA7-Bohol)

==============

Checkpoints ug gun 

ban, suspendido na

BOHOL, Oct. 5 (PIA)--Padayon nang gi-suspendi ang mga checkpoint ug ang gipatuman sa Commission on Election (Comelec) gun ban sa tibuok nasod.

Kini human madawat na sa Philippine National Police (PNP) ang official order gikan sa Comelec nga nagmandong suspendihon ang tanang aktibidad nga may kalabotan sa gi-oktabang piniliay sa Barangay ug Sangguniang Kabataan.

Apan gipasabot ni Bohol Provincial Police Office (BPPO) Director Sr. Supt. Felipe Natividad nga magpadayon pa gihapon ang pagpatuman sa anti-criminality checkpoints sa pipila ka lugar sa lalawigan sa Bohol.

Gibutyag usab niini nga may duha ka tawo ang nasikop gikan sa mga lungsod sa Getafe ug Talibon tungod sa paglapas sa phohibisyon sa gun ban.

Matud pa ni Natividad nga naa na ang desisyon sa Bohol Provincial Prosecutor’s Office kun pasakaan ba og kaso ang mga naaresto tungod sa paglapas sa Comelec gun ban.

Gilagdaan ni Presidente Rodrigo Duterte ang Republic Act 10952 nga nag-oktaba sa piniliay sa Barangay ug SK karon untang Oktubre ngadto na sa ikaduhang Lunes sa sunod tuig..

Nakalatid sa maong balaod nga “hold-over” o magpabilin sa posisyon ang mga nakalingkod nga opisyal sa Barangay ug SK, bisan ang mga opisyal sa barangay nga gitudlong ex-officio official sa Sangguniang Bayan ug Sangguniang Panlalawigan. (ecb/PIA7-Bohol)