Presidential Anti-Corruption 

Commission, gimugna ni Duterte

MANILA, Oct. 6 (PIA)--Gilagdaan ni Presidente Rodrigo Duterte ang usa ka executive order nga magmugna sa Presidential Anti-Corruption Commission (PACC) nga mag-imbestigar sa mga opisyal sa gobyerno nga nalambigit sa korapsiyon.

“The President’s power to appoint carries with it the power to discipline and remove public officials and employees, except those who are not otherwise subject to his disciplining authority as maybe provided by the Constitution and existing laws,” nakalatid sa Executive Order 43 ni Presidente Duterte.

Matud pa sa maong EO, magpahigayon og lifestyle check ug fact-finding ang PACC sa mando sa Presidente o motu propio bisan walay pormal nga reklamo batok sa mga opisyal ug kawani sa gobyerno.

Apil usab sa mahimong imbestigahan sa PACC ang mga naa sa gawas sa executive department kauban na ang mga miyembro ug opisyal sa Armed Forces of the Philippines (AFP) ug Philippine National Police (PNP).

Pamunoan sa usa ka chairman ug 4 ka miyembro ang PACC nga angay nga mga miyembro sa Philippine Bar.

Magrekomendar usab ang PACC nga pahamtangan og preventive suspension sa Office of the President ang gi-imbestigahang empleyado o opisyal sa gobyerno. 

Gilagdaan sa Presidente ang EO 43 niadtong Oktubre 4. (ecb/PIA7-Bohol)

===============

Bag-ong patakaran sa pagpadala og

balikbayan boxes, gi-suspenso una

MANILA, Oct. 6 (PIA)--Dili una ipatuman sa Bureau of Customs (BOC) ang mas gihingosgang balaod kalabot sa pagpadala og balikbayan boxes.

Sa gihimong pahayag ni Customs Commissioner Isidro Lapeña kagahapon, gi-suspenso niini ang Customs Administrative Order 05-2016 ug Customs Memorandum Order 04-2017 hangtod sa Marso 31,2018.

Kining patakaran nagmando sa mga Overseas Filipino Workers (OFW) nga gustong magpadala og balikbayan box sa ilang mga mahal sa kinabuhi sa Pilipinas nga moduso og kopya sa ilang Philippine passport aron makakuha og tax exemption sa gobyerno.

Bisan ang proof of purchase sa ilang mga gipamalit diin nakabutang ang mga sulod sa kahon, kinahanglan usab nilang i-prisintar.

Gibutyag ni Lapeña nga padayong nakadawat ang BOC og mga reklamo kalabot sa makuting mga rekisito nga gipangayo sa buhatan aron malibre ang balikbayan box gikan sa buhis. (ecb/PIA7-Bohol)