Evasco sa mga Kooperatiba: Magpabiling 

gawasnon sa impluwensya sa politiko

TAGBILARAN CITY, Oct. 8 (PIA)--Gi-awhag ni Cabinet Secretary Leoncio Evasco Jr. niadtong Biyernes ang mga kooperatiba sa pagpalig-on sa ilang ponduk ug magpabiling gawasnon gikan sa impluwensya sa mga politiko. 

Si Evasco ang pinasidunggang mamumulong sa ikaduhang adlaw sa ika-3 nga Central Visayas Cooperative Congress nga gipahigayon niadtong Oktubre 5-7, 2017 sa Bohol Tropics Resort ning dakbayan diin ang lalawigan sa Bohol maoy host.

Nagdala sa temang: “In Cooperativism, All Are Included, No One Should Be Left Behind,” gitambungan kini sa kinyentos ka mga miyembro sa kooperatiba, ahensiya sa gobyerno sa rehiyon, apil na ang mga opisyal gikan sa Cooperative Development Authority (CDA), Regional Cooperative Development Council (RCDC) ug mga opisyal sa nasudnong kagamhanan.

“I am advocating that cooperatives should be shielded from political influence because the moment you let politics get into the cooperative, that is the start of its downfall,” matud pa ni Evasco.

Gibutyag usab niini nga mahinungdanon kaayo nga ang mga kooperatiba magpadayon sa ilang kagawasan aron mapanalipdan ang interes sa mga sakop niini.

Gidugang usab ni Evasco nga ang mga kooperatiba kinahanglang dili usab motugot nga sudlan sila sa mga kapitalista nga maoy mo-diktar sa ilang mga kalihokan. 

Nitambag usab ang kalihim sa mga kooperatiba sa pagpili og mga opisyal nga adunay integridad alang sa pagpadayon sa pagpatunhay sa ilang pundok.

Gipasalig usab sa kalihim sa mga kooperatiba nga anaa kanila ang pagtabang sa gobyerno sa tanang pundok niini sa tibuok nasod. 

Samtang gibutyag ni CDA Chairman Orlando Ravanera nga adunay 26,000 ka kooperatiba sa tibuok nasod ug 1,770 ang naa sa Bohol. 

Giingong nag-empleyo kini og 2 miyon nga indirect ug 500,000 ka direktang trabaho apan 82% sa 26,000 ang gi-kunsiderar nga compliant cooperatives.

Ang Buwan sa Kooperatiba kun Cooperative Month gisaulog matag buwan sa Oktubre matag tuig sa Pilipinas agi og pagsunod sa Presidential Proclamation 493, series of 2003. (ecb/PIA7-Bohol)

3rd CV Coop Congress. Si Cabinet Secretary Leoncio Evasco Jr. (naa sa tunga) nagpahulagway kauban sa mga sumasalmot sa ika-3 nga Central Visayas Cooperative Congress nga gipahigayon sa Bohol Tropics niadtong Oktubre 6, 2017 diin iyang gi-awhag ang mga kooperatiba sa pagpalig-on sa ilang pundok ug magpabiling gawasnon gikan sa impluwensya sa mga politiko. (ecb/PIA7-Bohol)