Ika-12 nga Negosyo Center,

gibuksan sa Inabanga

INABANGA, BOHOL, Oct. 9 (PIA)--Gibuksan sa lungsod sa Inabanga inabagan sa Department of Trade and Industry (DTI) ang ika-12 nga Negosyo Center (NC) sa lalawigan sa Bohol nga nahimutang sa Municipal Hall Compound, sa Poblacion ning lungsod.

Gipangunahan nilang DTI Regional Director Asteria Caberte ug Inabanga Mayor Roygie Jumamoy ang pagbukas sa maong NC Inabanga kagahapon, Oktubre 9. 

Matud pa ni Caberte nga ang NC nga gimandu sa Go Negosyo Act, usa ka ‘one stop shop’ diin makaduol ang mga interesadong magpasugod sa ginagmay nga negosyo, aron sila matabangan sa pagparehistro sa ilang negosyo, magtambag sa mga angayan nga buhaton, magpahimutang sa mga kasayuran alang sa pagsugod og mga pangnegosyo ug mga kampanya alang sa pagpalabong ug pagpanalipud sa negosyo.

Pasilidad nga dumalahon sa local Small Medium Enterprise Development (SMED) Council uban sa DTI, ang NC sa Inabanga gibuksan aron magtanyag sa mga ginagmay nga negosyante sa kahigayunan nga matambagan sa mga angayan buhaton aron mokita ug makapalahutay kini.

Dugang pa ni Caberte, ang NC magtanyag og business advisory services, business name processing sulod lamang sa 15 minutos, mopahigayon og mga business meetings, trainings ug seminars alang sa business sector sa lungsod sa Inabanga ug mga silingang lungsod niini.

Samtang sa iyang bahin, mapasalamaton si Mayor Jumamoy sa paglusad sa maong NC sa ilang lungsod ug mi-awhag sa mga Inabangahanon sa pagpahimos niini diin matud pa maghatag ug lain na usab nga maayong dalan alang sa ilang lungsod.

Kining NC Inabanga usa ka kolaborasyon tali DTI, SMEDs, Department of Science and Technology (DOST), Department of Interior and Local Government (DILG), Technical Education and Skills Development Authority (TESDA), Department of Agriculture (DA) ug sa lokal nga kagamhanan sa Inabanga. (ecb/PIA7-Bohol)

Negosyo Center sa Inabanga. Gipangunahan nilang DTI-7 Regional Director Asteria Caberte ug Inabanga Mayor Roygie Jumamoy ang pagputol sa ribbon atol sa pagbukas sa ika-12 nga Negosyo Center sa Bohol nga nahimutang sa Inabanga Municipal Hall Compound sa Poblacion Inabanga. (ecb/PIA7-Bohol)

Negosyo Center Inabanga. Ang ika-12 nga Negosyo Center sa Bohol gibuksan niadtong Oktubre 9 sa lungsod sa Inabanga diin nahimutang kini kilid sa maong munisipyo. Magtanyag kini og mga business advisory services, business name processing sulod lamang sa 15 minutos ug mopahigayon usab og mga business meetings, trainings ug seminars alang sa sektor sa patigayon sa lungsod sa Inabanga ug mga silingang lungsod niini. (ecb/PIA7-Bohol)