EO alang sa pagmugna og bangko sa 

mga OFWs, gilagdaan na ni Duterte

TAGBILARAN CITY, Oct. 10 (PIA)--May maayong balita alang sa mga Overseas Filipino Workers (OFWs) tungod kay magtukod na og bangko nga gigahin lamang alang kanila.

Base sa Executive Order Number 44 nga gilagdaan ni Presidente Rodrigo Duterte, gi-aprubahan na niini ang pagpalit sa Land Bank of the Philippines (LBP) sa Philippine Postal Savings Bank (PPSB) aron himuong Overseas Filipino Bank.

Kinahanglan lamang nga aprubahan sa Bangko Sentral ng Pilipinas (BSP), Securities and Exchange Commission (SEC), Philippine Deposit Insurance Corporation (PDIC) ug Philippine Competition Commission aron padayon nang mapalit sa LBP ang PPSB.

Gimanduan usab ni Duterte ang LBP nga maggahin og kapital aron mas mapakusog ang gilaraw nga pagpatukod og bangko alang sa mga OFWs.

Siyam ka miyembro ang gitudlong board members sa maong Overseas Filipino Bank nga maoy magdumala sa pagpadagan sa bangko.

Una nang gisaad sa Presidente nga magpatukod siya og bangko nga alang lamang sa mga Pinoy overseas aron mapadali ang pagpadala og salapi sa ilang mga mahal sa kinabuhi sa nasod. (ecb/PIA7-Bohol)

==================

Voter’s registration,

buksan og balik sa Comelec

TAGBILARAN CITY, Oct. 10 (PIA)--Gitakdang buksan og balik sa Commission on Elections (Comelec) ang voter’s registration sa sunod buwan.

Kini human masapinal na ang kanselasyon sa piniliay sa Barangay ug Sangguniang Kabataan (SK) nga gitakda unta karong buwan.

Matud pa ni Comelec Chairman Andres Bautista, gusto nilang hatagan pa og kahigayonan ang publiko nga makapatala o maka-update sa voter’s data.

Gibanabanang kapin sa 56 milyon ang rehistradong botante alang sa barangay elections, samtang naa usab sa 20 milyon ang rehistrado na alang sa SK elections.

Gamiton usab sa Comelec ang panahon aron hinluan ang voters list, sa dili pa ang piniliay sa sunod tuig.

Kahinumdomang gihunong nila ang registration niadtong Abril aron pangandaman ang piniliay nga karong buwan unta ipahigayon, apan gi-oktaba na sa Mayo sunod tuig agig pagsunod sa Republic Act 10952 nga gilagdaan ni Presidente Rodrigo Duterte. (ecb/PIA7-Bohol)