Duha ka LPA, gibantayan

karon sa PAGASA

TAGBILARAN CITY, Oct. 11 (PIA)--Duha ka dili maayong panahon ang gibantayan karon sa Philippine Atmospheric, Geophysical and Astronomical Services Administration (PAGASA) diin ang usa niini naa na sulod sa nasod samtang ang usa naa pa sa boundary sa Philippine Area of Responsibility (PAR).

Ang LPA nga naa na sulod sa nasod katapusang nasigpatan sa PAGASA sa gilay-ong 350 kilometros sidlakang bahin sa Casiguran, Aurora.

Ang maong LPA magdala og katag-katag nga mga pag-ulan ngadto sa kusog nga pag-ulan nga mahimong makaingon sa pagbaha ug pagdahili sa yuta kun flashfloods sa Metro Manila, Central Luzon, Cordillera Administrative Region, Cagayan Valley ug CALABARZON.

Samtang ang mga nahabilin pang parte sa nasod makasinati og kasarangan ngadto sa madag-umon nga kalangitan ilabi na sa hapon o gabii tungod sa thunderstorms.

Samtang matud pa usab ni PAGASA senior weather specialist Chris Perez, ang LPA nga naa sa boundary pa lamang sa PAR adunay tsansa nga mahimong usa ka bagyo.

Naa sa sidlakang bahin sa Visayas ang maong LPA ug pangalanan kining Odette kun mahimong bagyo samtang naa sulod sa nasod. (ecb/PIA7-Bohol)

============

Gipalapdang tabang, tanyag sa DOLE

sa mga nawad-an og trabaho sa K-12

TAGBILARAN CITY, Oct. 11 (PIA)--Makadawat og dugang tabang ang mga teaching ug non-teaching personnel sa mga higher education institutions (HEI) nga nawad-an og trabaho tungod sa implementasyon sa K to 12 program.

Base sa Department Order No. 177 nga ipatuman sugod Oktubre 16, gimando niini ang kantidad sa tabang pinansyal sa mga HEI personnel nga nawad-an og trabaho. Gi-amyendahan sa bag-ong kamanduan ang DO 152-16 o ang Guidelines in the Implementation of K to 12 DOLE Adjustment Measures Program.

Pipila sa mga gibag-o sa maong DO ang pagpa-uswag sa gidak-on sa programa, pagpataas sa panahon aron maka-apply, pagdugang sa kantidad sa tabang pinansiyal, ug probisyon sa differential financial support nga base sa bag-ong pagkalkulo sa tabang pinansyal.

Ang mga benepisyaryo makadawat na og tabang pinansiya nga P10,000, 75 porsiyento sa katapusang binuwan nga suholan sa aplikante, o base sa median salary sa HEI personnel, kun unsa ang mas taas.

Apil na usab sa mga kwalipikadong benepisyaryo sa programang K to 12 DOLE AMP ang mga nikuha og early retirement program ug voluntary separation program, ug bisan ang mga may kontrata nga wala na na-renew, ug ang mga nagtrabaho pa apan gipaubos sa suspensyon sa trabaho.

Human sa pagpa-uswag sa panahon sa pagpatala, nahisulod na usab sa K to 12 DOLE AMP ang mga HEI personnel nga nawad-an og trabaho gikan Mayo 30, 2014, ang adlaw sa pagpagawas sa DOLE-DepEd-TESDA-CHED Joint Guidelines, ug hangtod sa katapusan sa academic year 2021-2022.

Aron mapamubo ang proseso sa aplikasyon ug mas daghan pa ang makuhang benepisyaryo, ang kaniadtong 6 ka documentary requirements gihimo na lamang 4 karon ug ang panahon sa aplikasyon gi-uswag pa gikan sa usa ka buwan ngadto na sa usa ka tuig.

Ang mga documentary requirements mao ang K to 12 DOLE AMP application form; Certificate of Displacement, o kopya sa complaint nga gidawat sa National Labor Relations Commission (NLRC), diin ang benepisyaryo niduso na og kaso sa NLRC; Certificate of Employment and Compensation; ug uban pang government-issued identification card.

Angay usab nga personal nga moduso sa ilang kumpletong documentary requirements ang bisan kinsang aplikante sa bisan asang DOLE Regional o Field Offices nga dili molapas og usa ka tuig gikan sa adlaw sa pagkatangtang sa trabaho; samtang ang mga HEI personnel nga nawad-an og trabaho sa wala pa ang pagpagawas sa DO 177 gihatagan og usa ka tuig gikan sa pag-anunsiyo niini aron maka-aplay.

Alang usab sa mga totally displaced beneficiaries nga padayong makadawat og tabang pinansyal, angay silang makasunod sa conditional requirement nga usa ka proof of active job search o “job contact” ang gikinahanglan.

Ang bag-ong kamanduan retroactive hangtod Mayo 30, 2014. Ang mga kasamtangang benepisyaryo ug ang mga nakatapos na sa programa makadawat og differential financial support base sa bag-ong financial support computation. (ecb/PIA7-Bohol/DOLE reports)