Duterte, gimanduan ang PDEA

nga manguna sa war on drugs

MANILA, Oct. 12 (PIA)--Gitangtang na ni Presidente Rodrigo Duterte sa Philippine National Police (PNP), National Bureau of Investigation (NBI), Armed Forces of the Philippines (AFP) ug uban pang law enforcement agencies ang pagpahigayon sa “Oplan Tokhang” o anti-drug ope­rations ug solong gitahasan ang Philippine Drug Enforcement Agency (PDEA) nga pangunahan ang drug war.

Sa memorandum nga gipagawas sa Malakanyang nga gilagdaan ni Presidente Duterte, ang PDEA na lamang ang mahimong magdumala sa operasyon ug kampanya batok sa ilegal nga droga.

Samtang gitahasan usab sa Presidente ang PNP, NBI, AFP, Bureau of Customs, Philippine Postal Corporation ug uban pang ad-hoc agency nga ihatag sa PDEA ang tanang impormasyon o datos nga ilang gigonitan kalabot sa ilegal nga droga.

“The PNP, shall at all times, maintain police visibility, as a deterrent to illegal drug activities leaving to the PDEA however the conduct of anti-illegal drug operations as aforestated,” nakalatid sa maong memo.

Gipasabot sa Presidente nga gihimo niya kini aron ibutang sa tarung ang kampanya sa gobyerno batok sa ilegal nga droga.

Kahinumdoman nga nahimong sentro sa kontrobersiya ang anti-drug war sa gobyerno diin mi-ani kini og pagsaway gikan sa nagkalain-laing sektor apil na ang United Nations (UN) tungod sa giingong liboang napatay pinaagi sa extra judicial killings. (ecb/PIA7-Bohol)

================

Duterte, nagbutang og

OIC sa DICT ug DOH

MANILA, Oct. 12 (PIA)--Nagbutang si Presidente Rodrigo Duterte og officers-in-charge (OIC) aron temporaryong mamuno sa Department of Information and Communications Technology (DICT) ug sa Department of Health (DOH).

Gipahibalo ni Presidential Spokesperson Ernesto Abella nga si Undersecretary Eliseo Mijares Rio Jr. ang gitudlo isip OIC sa DICT samtang si Undersecretary Herminigildo Valle ang OIC sa DOH.

Gitudlo si Mijares human niluwat sa pangatungdanan ning bag-o lang sa iyang puwesto si kanhi DICT Kalihim Rodolfo Salalima.

Samtang wala usab gi-kumpirmar sa Commission on Appointments (CA) si kanhi DOH Kalihim Ubial maong gitudlo si Valle isip OIC. (ecb/PIA7-Bohol)