Turista sa Bohol sa '16

milapas sa 1 ka milyon

TAGBILARAN CITY, October 10 (PIA)--Gikan sa kapin sa 602 mil ka turista nga nahitapnas ug misuroy sa Bohol niadtong 2015, misulbong kini ngadto na sa kapin sa usa ka milyon sa 2016, dungan sa pagtala sa Bohol sa 65% nga ugmad sa gidaghanon sa mibisita sa Bohol.

Milapas na sa usa ka milyon ang nahidangat sa Bohol sa 2016: 266,313 niini mga langyaw nga bisita ug 731,915 niini mga domestic o lokal nga mga turista. 

Duolan usab sa 2 mil ka Pinoy nga miuli sa nasud og miabang og mga lawak ug misuroy sa Bohol ang nahilakip sa ihap. 

Gani, ang kasaturan nga gipaambit, wala pa mag-apil sa mas dako nga bul-og sa mga turista nga mibisita sa Bohol ug wala na magpagabii, sa ilang pagsinati sa day-tour lamang. 

Segun sa mga batakan sa Department of Tourism (DOT), kadto lamang mokuha og kwartong kahigdaan ang malakip sa ihap sa mga turista nga matala sa room occupancy reports nga magsukad sa mga Municipal Tourism officers sa kalungsuran. 

Og subay niini, napakita nga bisan pag apektado ang turismo sa Bohol sa mga di mapugngan nga mga kakuli-an ilabi na sa kadtong may kalambigitan sa pagpagawas sa mga travel advisories ug sa mga katalagmang nahi-aguman sa lalawigan. 

Apan, kon kanus-a mihinay ang langyaw nga mga turista, misulbong usab ang lokal nga mga turista aron hulipan ang pagkunhod sa mga turista segun sa una nang gikataho. 

Kini maoy nabutyag sa Bohol Tourism Office pinaagi ni BT Officer Josephine Cabarrus, atul sa Kapihan sa PIA sa miaging semana. 

Sa tulo ka tuig nga Comparative Data sa Tourist Arrivals sa lalawigan sa Bohol sa unang lima ka buwan sa 2015, mikabat sa 206,096 ka turista ang misuroy sa Bohol. 

Niining tuiga, may 119, 088 ka mga domestic tourists ug 94, 088 ka turistang lanyaw nga midangat sa Bohol. 

Sa pagka sunod tuig, dako ang giambak sa lokal nga mga turista, nga mipilo sa makatulo sa gidaghanon sa 2015, dihang natala sa Bohol ang 303,854 ka domestic tourists. 

Dyutay nga pagtaas usab ang namatikdan sa BTO sa 2016 sa langyaw nga mga turista nga miabut sa 118,065. 

Sa 2016, kinatibuk-ang 314, 854 ka turista ang natala nga misuroy og mihigda ug labing manos usa ka gabii sa Bohol, sa unang lima ka buwan.

Gikan sa Enero nagdto sa Mayo sa 2017, amenado ang BTO nga apektado ang Bohol sa pagasdang sa mga armadong sakop sa Abu Sayyaf niadtong Abril. 

Ang pagbuto sa presensya sa mga armadong sakop sa ASG maoy hinungdan nga nagpagawas ang pipila ka mga foreign embassies sa travel advisory nga nagdili sa ilang mga katawhan sa pagbisita sa Visayas ug Mindanao.

Mahimong tungod sa travel advisories o sa mga balita nga gipagawas kabahin sa ASG, mikunhod ang arrivals sa mga langyaw nga turista kon itandi sa 2016. 

Gikan sa 118 mil ka langyaw nga turista sa unang lima ka buwan sa 2015, nikunhod kini sa ngadto na sa 71, 937 sa 2017. 

Apan sa pagkanaug sa gidaghanon sa mga langyaw, niabut usab sa 190,137 ka domestic nga turista ang miabut sa Bohol. 

Naa pa sa 262,074 ka turista ang makaabut sa Bohol sa unang lima ka buwan sa 2017, subay ning comparative data nga gipaambit. (rahc/PIA-7/Bohol)