OPAV mususi sa paggamit 

sa ilang ngan pagpangilad

TAGBILARAN CITY, October 10 (PIA)--Susihon sa Office of the Presidential Assistant for the Visayas (OPAV) ang taho nga may kahugpungang nagsuroysuroy sa kabarangayan ug migamit sa OPAV aron mangilad. 

Matud ni OPAV Michael Dino, ang iyang buhatan nagsusi na karon sa taho nga may nagsabotahe sa ngalan sa Presidente dinhi sa Visayas.

Ang atong Buhatan nagsubay na sa taho nga may pundok nga naglibot sa kabarangayan sa Visayas nga miangkon nga naglihok sa Presidente ug nanglibkas og mga saad nga mini. 

Dugang ni Secretary Dino, daghan na nga kongresista ug mga mayor nga mireklamo sa iyang buhatan kalabut ning pundok nga maghimog saad sa katawhan ilabi na sa mga programa sa kagamhanan nga abig sa mga kabus. 

Wala pa sa ilang mga gipang-saad ang natuman, padayon ni Dino. 

Ang nakapa-it pa, nangayo pa kini og kwarta gikan sa mga kabus nga ilang gipasaligan sa tabang paghaw-as sa mga naulahi sa kawad-on sama sa mga programang abag sa panginabuhi-an.

Ang mga kabus maoy economic class nga mas dali nga maapektohan ug mahaylo sa mga saad sa kagamhanan sa pag-alibyo sa kinabuhi. 

Gitumbok usab ni Dino nga kasagaran sa wala makaayon sa performance ni Presidente Duterte karon, nia sa mga kabus o economic class E nga naa sa 26% ilabi na gayud niadtong diha sa mga urban nga lugar nga moabut sa 20%, segun sa labing bag-o nga Social Weather Station (SWS) Survey. 

Buyag ni Sec. Dino nga sayud sila nga naay daghang mga Local Government units nga nagpatuo nga kaalyado sa Presidente apan nagduot na hinuon aron madaut ang mga programa sa Administrasyon. 

Gitumbok usab sa OPAV nga ang nasudnong datus sa krimen mingkubos tungod sa pagpakigbatok sa Presidente sa drugas, apan sa dili tataw nga suport sa ubang LGUS, sama sa pagpugong sa mga insentibo og pahalipay sa kapolisan sa ilang mga kadaugan, nakapa-lad-ang sa buot sa kapolisan sa dugang pagpaningkamot. 

Niini usab, nakapahibalik sa mga ginagmay nga kriminalidad, ug butyag ni Sec Dino, nakaapekto sa persepsyon sa sa katawhan sa kalampusan sa kagamhanan. (rahc/PIA-7/Bohol)